បន្ទាយមានជ័យ ៖ និយ័តករធានារ៉ាប់រងកម្ពុជា (ន.ធ.ក.) បានរៀបចំសិក្ខាសាលាស្តីពី “ការធានារ៉ាប់រងជាកាតព្វកិច្ច” ក្រោមអធិបតីភាព ដ៏ខ្ពង់ខ្ពស់ ឯកឧត្តម ប៊ូ ច័ន្ទភីរូ អគ្គនាយក នៃ ន.ធ.ក. និងមានការអញ្ជើញចូលរួមដ៏ខ្ពង់ខ្ពស់ពី លោក លី សុវណ្ណារិទ្ធ អភិបាលរង នៃគណៈអភិបាលខេត្តបន្ទាយមានជ័យ តំណាងដ៏ខ្ពង់ខ្ពស់ឯកឧត្តម អ៊ុំ រាត្រី អភិបាលខេត្ត ព្រមទាំងការចូលរួមពីតំណាងសមាជិកក្រុមការងារអន្តរក្រសួង តំណាងមន្ទីរ ស្ថាប័នពាក់ព័ន្ធខេត្ត អាជ្ញាធរមានសមត្ថកិច្ច និងគ្រឹះស្ថានឯកជន ធ្វើឡើងនៅសណ្ឋាគារ ដឹ វ៉ាយ ផាលែស ព្រឹកថ្ងៃទី២១ ខែកុម្ភៈ ឆ្នាំ២០២៤។
គោលបំណងនៃសិក្ខាសាលានេះ គឺដើម្បីផ្សព្វផ្សាយ និងបញ្ជាបការយល់ដឹងអំពីការធានារ៉ាប់រងឱ្យបានកាន់តែទូលំទូលាយជូនសាធារណជន ក្រសួងស្ថាប័នដែលមានសមត្ថកិច្ចពាក់ព័ន្ធ និងវិស័យឯកជន ជាពិសេស រួមចំណែកការពារផលប្រយោជន៍សិទ្ធិ និងកាតព្វកិច្ចរបស់អ្នកត្រូវបានធានារ៉ាប់រង តាមរយៈការគូសបង្ហាញពី មូលដ្ឋានគ្រឹះ ប្រភេទ និងអត្ថប្រយោជន៍នៃការធានារ៉ាប់រង និងការធានារ៉ាប់រងជាកាតព្វកិច្ច ព្រមទាំងតួនាទីនិង ភារកិច្ចរបស់ ន.ធ.ក.។
ឯកឧត្តម ប៊ូ ច័ន្ទភីរូ បានថ្លែងអំណរគុណ និងវាយតម្លៃខ្ពស់ ចំពោះកិច្ចខិតខំប្រឹងប្រែង របស់ ន.ធ.ក. ក្រសួង-ស្ថាប័ន និងតួអង្គពាក់ព័ន្ធ ដែលបានបន្តពង្រឹងកិច្ចសហប្រតិបត្តិការក្នុងការបំពេញការងារ លើកកម្ពស់ការអភិវឌ្ឍន៍វិស័យធានារ៉ាប់រងនៅកម្ពុជា ជាពិសេសបានបន្តសហការជំរុញការអនុវត្តធានារ៉ាប់រងជា កាតព្វកិច្ច ក្នុងន័យឆ្លើយតបឱ្យបានសមស្របទៅនឹងកំណើនចំនួនការដ្ឋានសាងសង់ និងយានយន្តប្រកបអាជីវកម្ម ដែលកំពុងចរាចរណ៍តាមដងផ្លូវ រួមផ្សំនឹងអត្រាកំណើនគ្រោះថ្នាក់ចរាចរណ៍ប្រចាំថ្ងៃដែលបាននិងកំពុងផ្តល់ផល ប៉ះពាល់ដល់ទ្រព្យសម្បត្តិ រូបរាងកាយ និងអាយុជីវិតរបស់ប្រជាពលរដ្ឋ។
ក្នុងឱកសនោះសិក្ខាកាមបានបង្ហាញនូវការយកចិត្តទុកដាក់ និងគាំទ្រលើការប្រើប្រាស់ធានារ៉ាប់រងជាវិធីសាស្រ្តក្នុងការផ្ទេរ និងសម្រួលបន្ទុកហិរញ្ញវត្ថុនៅពេលមានហានិភ័យណាមួយកើតមានឡើង។ បន្ថែមពីនេះ សិក្ខាកាមបានជ្រាប ច្បាស់ពីប្រភេទនៃការធានារ៉ាប់រងជាកាតព្វកិច្ច និងបានផ្លាស់ប្តូរមតិយោបល់យ៉ាងផុសផុលជុំវិញសារៈសំខាន់នៃ ការសហការពីគ្រប់តួអង្គពាក់ព័ន្ធគ្រប់លំដាប់ថ្នាក់ ដើម្បីជំរុញការអនុវត្តការធានារ៉ាប់រងជាកាតព្វកិច្ចប្រកបដោយ ប្រសិទ្ធភាព៕ អត្ថបទ រឿង ចន្ទ្រា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
