ខេត្តពោធិ៍សាត់ ៖ សិក្ខាសាលាពង្រឹងសមត្ថភាព ស្តីពីភាពជាអ្នកដឹកនាំ និងយន្តការ​គ្រប់​គ្រង​គណៈ​កម្មាធិការ​បណ្តុះបណ្តាលថ្នាក់ខេត្ត សម្រាប់ខេត្តចំនួន៦ រួមមានខេត្តក្រចេះ មណ្ឌលគិរី រតនគិរី ស្ទឹងត្រែង ព្រះវិហារ និងខេត្តពោធិ៍សាត់ត្រូវបានរៀបចំធ្វើឡើងនៅខេត្តពោធិ៍សាត់ រយះពេល២ថ្ងៃ គឺ​ពី​ថ្ងៃទី២០ ដល់ថ្ងៃទី២១ខែកុម្ភៈ ឆ្នាំ២០២៤ ដោយមាន មាន​ការ​អញ្ជើញ​ចូលរួម​ដោយ​អភិបាល​រង​ខេត្ត និងជាតំណាងគណៈកម្មាធិការបណ្តុះបណ្តាលមកពីខេត្តទាំង៦, អ្នក​សម្រប​សម្រួល​កម្មវិធី PTB និងSMS នៃស្វីសខនថាក់, ប្រធានមន្ទីរការងារ និង​បណ្តុះ​បណ្តាល​វិជ្ជាជីវៈ​ខេត្តទាំង​៦ រួមនិង នាយកគ្រឹះស្ថាន អ.ប.វ. និងជាលេខាធិការ នៃ​គណៈកម្មាធិការ​បណ្តុះ​បណ្តាល​ខេត្ត​។

ក្នុងឱកាសអញ្ជើញបើកសិក្ខាសាលានេះ លោក អ៊ុក សំសុវត្យា អគ្គនាយករង នៃ​អគ្គ​នាយក​ដ្ឋាន​អប់រំ បណ្តុះបណ្តាលបច្ចេកទេស និងវិជ្ជាជីវៈ បានលើកឡើងថា សិក្ខាសាលានេះ​គឺ​សម្រាប់​ខេត្ត​មក​ពី​ភូមិភាគឦសានចំនួន៥ បូករួមទាំងខេត្តពោធិ៍សាត់ផងនោះ ត្រូវបានរៀបចំឡើងដោយ​ទទួល​បាន​ការ​គាំទ្រ​ពីកម្មវិធីអភិវឌ្ឍន៍ជំនាញ(SDP) នៃស្វីសខនថាក់ ក្នុងគោលបំណង ដើម្បី​ពង្រឹង​យន្ត​ការ​ការ​គ្រប់គ្រង អភិបាលកិច្ច ក្រមប្រតិបត្តិ (PTB) និងការសម្របសម្រួល​នៃការ​អនុវត្ត​ការងារ វិស័យអប់រំបណ្តុះបណ្តាលបច្ចេកទេស និងវិជ្ជាជីវៈ ពីមន្ទីរពាក់ព័ន្ធ និង​កសាង​ភាព​ជាដៃ​គូ​វិស័យឯកជន ឧស្សាហកម្ម​ក្នុង​ខេត្ត​ព្រម​ទាំង​ចូល​រួម​សម្រេច​គោល​នយោបាយជាតិ ស្តីពី​ការ​អប់រំ​បណ្តុះបណ្តាលបច្ចេកទេស និង វិជ្ជាជីវៈ និងលទ្ធផលសម្រេចបានកន្លងមក និង​ដើម្បី​ឆ្លុះ​បញ្ចាំង​ពី ភាពជាអ្នកដឹកនាំ និងយន្តការគ្រប់គ្រង នៃការ អនុវត្តផែនការប្រតិបត្តិ កន្លងមក និង​ចែក​រំលែក​បទពិសោធន៍ ភាពជាអ្នកដឹកនាំ យន្តការគ្រប់គ្រង ដ៏មាន ប្រសិទ្ធិភាព និង​ស័​ក​សិទ្ធិភាព ។

ក្នុងនោះដែរ លោក អ៊ុក សំសុវត្យា សូមថ្លែង​អំណរគុណ​យ៉ាង​ជ្រាល​ជ្រៅដល់​ស្វីស​ខន​ថាក់ តាមរយៈកម្មវិធី អភិវឌ្ឍន៍ជំនាញ(SDP) ដែលតែងតែឧ​បត្ថម្ភ​គាំទ្រ​ដល់​ដំណើរ​ការ​អភិវឌ្ឍ​ជំនាញ​របស់ក្រសួងការងារ និង បណ្តុះបណ្តាលវិជ្ជាជីវៈ ជាពិសេសគាំទ្រដល់ DGTVET នាពេលកន្លងមក និងពេលបន្តបន្ទាប់ទៅមុខទៀត និងសូមអរគុណ​ដល់​រដ្ឋបាល​ខេត្តពោធិ៍សាត់​ដែល​បាន​សហការ​រៀបចំ​សិក្ខាសាលានេះ ។ ឆ្លៀតក្នុងឱកាសនោះដែរ លោក អ៊ុក សំសុវត្យា សូម​ឲ្យ​ភាគី​ពាក់ព័ន្ធត្រូវជួយផ្សព្វផ្សាយកុំឲ្យប្រជាពលរដ្ឋមួយចំនួនមានការយល់ច្រឡំ ពាក់ព័ន្ធ ផែនការបណ្តុះបណ្តាលជំនាញវិជ្ជាជីវៈ និងបច្ចេកទេសទៅដល់យុវជនមកពីគ្រួសារក្រីក្រ និង​គ្រួសារ​ងាយរងហានិភ័យចំនួន ១,៥ លាននាក់របស់រាជរដ្ឋាភិបាល ប្រសិនបើគ្រួសារក្រីក្រមួយ មានកូន​៣នាក់ មកចូលរៀនអាហារូបករណ៍វិជ្ជាជីវៈ និងបច្ចេកទេសវគ្គខ្លី គឺទទួល​បាន​ប្រាក់​ឧបត្ថម្ភ​ប្រចាំ​ខែពីរាជរដ្ឋាភិបាលទាំង៣នាក់ ហើយសម្រាប់​គ្រួសារ​គាត់​ដែល​ទទួល​បាន​ការ​ឧបត្ថម្ភ​ពី​រាជរដ្ឋាភិបាលតាមរយៈបណ័ក្រីក្រគឺនៅតែទទួលបានដដែល ។

សិក្ខាសាលារយៈពេល២ថ្ងៃនេះ អង្គសិក្ខាសាលា​ក៏​បាន​ធ្វើ​ទស្សនកិច្ច​សិក្សា​ទៅ​កាន់​រោងចក្រ​ដំឡើង​រថយន្ត Ford នៅតំបន់សេដ្ឋកិច្ចខេត្តពោធិ៍សាត់ ស្ថិតក្នុងស្រុកក្រគរផងដែរ ដើម្បីឲ្យ​គណៈកម្មាធិការ​បណ្តុះ​បណ្តាលតាមបណ្តាលខេត្តភូមិភាគឦសាន ភ្ជាប់ទំនាក់ទំនង និង វិស័យ​ឧស្សាហកម្ម​គ្រឿងយន្ត ជាពិសេសស្វែងយល់ពីបទពិសោធន៍ អំពីកិច្ចសហការ​ដ៏​ល្អរ​វៀង​រោង​ចក្រ​ដំឡើង​រថយន្ត Ford និងវិទ្យាស្ថានពហុបច្ចេកទេសខេត្តពោធិ៍សាត់ លើការ​បណ្តុះ​បណ្តាល​ជំនាញ និងផ្តល់ឱកាសការងារ ជូនដល់យុវជនក្នុងខេត្តពោធិ៍សាត់ ដោយបច្ចុប្បន្ន​ក្នុង​រោង​ចក្រ​ដំឡើង​រថយន្ត Ford មានបុគ្គលិកភាគច្រើនជាយុវជនក្នុងខេត្ត និងភាគច្រើនជាសិស្សចេ​ញ​ពីវិទ្យាស្ថាន​ពហុបច្ចេកទេសខេត្តពោធិ៍សាត់ ៕អត្ថបទ៖ ពៅ ភិរុណ