ភ្នំពេញ៖ សម្ដេចតេជោ ហ៊ុន សែន ប្រធានគណបក្សប្រជាជនកម្ពុជាដែលកំពុងដឹកនាំរាជរដ្ឋាភិបាល បានអំពាវនាវទៅគណបក្សនយោបាយទាំងអស់ ឱ្យប្រកាន់យកឥរិយាបថថ្មីអំឡុងពេលពិភពលោកកំពុងជួបប្រទះនឹងវិបត្តិកូវីដ-១៩នេះ។
សម្ដេចតេជោ ហ៊ុន សែន បានថ្លែងបែបនេះនៅក្នុងកិច្ចប្រជុំកំពូលរវាងថ្នាក់ដឹកនាំបក្សកុម្មុនីស្តចិន និងគណបក្សនយោបាយលើពិភពលោក ដែលត្រូវបានធ្វើឡើងតាមប្រព័ន្ធអនឡាញនៅយប់នេះ។
ក្នុងសុន្ទរកថា សម្ដេចតេជោ ហ៊ុន សែន បានស្នើឡើងនូវទស្សនទានរបស់សម្ដេច ដោយអំពាវនាវឱ្យគណបក្សនយោបាយទាំងអស់លះបង់ចោលឥរិយាបថច្រណែនឈ្នានីស និងចាំតែរិះគន់គ្មានមូលដ្ឋាន ហើយជំនួយមកវិញនូវគំនិតបែបស្ថាបនិយមសម្រាប់ដោះស្រាយវិបត្តិកូវីដ-១៩។
សម្ដេចតេជោ ហ៊ុន សែន ថ្លែងថា៖ «ក្នុងកាលៈទេសៈពោរពេញទៅដោយភាពប្រឈមដ៏ស្រួចស្រាល់នេះ គណបក្សនយោបាយ គួរតែប្រកាន់យកនូវការទទួលខុសត្រូវខ្ពស់ចំពោះជាតិ និងប្រជាជន ព្រមទាំងបញ្ឈប់ឱ្យបាននូវវប្បធម៌ និងឥរិយាបថច្រណែនឈ្នានីស ចាំតែមើលបំណាំ ចោទប្រកាន់ និងរិះគន់គ្មានមូលដ្ឋាន ដោយជំនួសមកវិញនូវឥរិយាបថបែបស្ថាបនានិយម និងស្មារតីនៃកិច្ចសហការក្នុងការដោះស្រាយបញ្ហាប្រឈមរបស់មនុស្សជាតិ និងប្រជាជន ទាំងក្នុងក្របខណ្ឌពិភពលោក ក៏ដូចជាក្នុងប្រទេសនីមួយៗ»។
សម្ដេចតេជោ ហ៊ុន សែន បានថ្លែងបែបនេះចំពេលដែលពិភពលោកទាំងមូល រួមទាំងកម្ពុជាផងដែរ កំពុងប្រយុទ្ធនឹងការឆ្លងរីករាលដាលនៃមេរោគកូវីដ-១៩អស់រយៈពេលជាងមួយឆ្នាំមកហើយនោះ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
