ក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃអង្គារ (ទី២០ ខែកុម្ភៈ) បានដាក់ទណ្ឌកម្មមនុស្ស ៦នាក់មកពីក្រុមប្រដាប់អាវុធចំនួន៥ នៅភាគខាងកើតនៃសាធារណរដ្ឋប្រជាធិបតេយ្យកុងហ្គោ (DRC) ខណៈដែលការប៉ះទង្គិចគ្នាដោយហិង្សា កើនឡើងខ្លាំងនៅក្នុងតំបន់នេះ រវាងកងទ័ពកុងហ្គោ និងក្រុមឧទ្ទាម M23 ដឹកនាំដោយក្រុមជនភាគតិច Tutsi ដែលគាំទ្រដោយប្រទេសរ្វ៉ាន់ដា។

ភ្លើងសង្គ្រាមដែលអូសបន្លាយជាច្រើនទសវត្សរ៍មកហើយនោះ បានបង្កើនហានិភ័យកាន់តែខ្ពស់នៃការមានជម្លោះយ៉ាងខ្លាំងក្លា រវាងកុងហ្គោ និងរ៉្វាន់ដា ដែលការប៉ះទង្គិចនោះអាចមានពាក់ព័ន្ធដល់កម្លាំងនៃប្រទេសជិតខាង និងក្នុងតំបន់ ដែលរួមមានអាហ្វ្រិកខាងត្បូង ប៊ូរុនឌី អ៊ូហ្គង់ដា តង់ហ្សានី និងម៉ាឡាវី។

នៅឯកិច្ចប្រជុំរបស់ក្រុមប្រឹក្សាសន្តិសុខដែលមានសមាជិក ១៥ប្រទេស កាលពីថ្ងៃអង្គារនោះ លោក Robert Wood ឯកអគ្គរដ្ឋទូតរងសហរដ្ឋអាមេរិកប្រចាំនៅអង្គការសហប្រជាជាតិ (UN) បានប្រាប់ថា៖ «សហរដ្ឋអាមេរិកគាំទ្រយ៉ាងពេញទំហឹងនូវអធិបតេយ្យភាព និងបូរណភាពទឹកដីរបស់សាធារណរដ្ឋប្រជាធិបតេយ្យកុងហ្គោ (DRC) និងសន្តិភាពយូរអង្វែង សម្រាប់ប្រជាជនកុងហ្គោទាំងអស់។ រ៉្វាន់ដា និង DRC ត្រូវតែដើរចេញពីមាត់ជ្រោះនៃសង្រ្គាម»។

គណៈកម្មាធិការទណ្ឌកម្ម DRC របស់ក្រុមប្រឹក្សាសន្តិសុខ បានដាក់ទណ្ឌកម្មលើការទិញដូរអាវុធ ការហាមឃាត់ការធ្វើដំណើរ និងការបង្កកទ្រព្យសម្បត្តិ ចំពោះមេដឹកនាំ ២រូប រួមជាមួយកងកម្លាំងប្រជាធិបតេយ្យសម្ព័ន្ធមិត្ត (ADF) មេដឹកនាំម្នាក់មកពីក្រុមប្រដាប់អាវុធ Twirwaneho និងបុគ្គលម្នាក់មកពីក្រុមឧទ្ទាមនៃសម្ព័ន្ធប្រជាជនជាតិ ដើម្បីអធិបតេយ្យភាពកុងហ្គោ (CNPSC)៕