រដ្ឋមន្ត្រីការបរទេសចិន លោក Wang Yi បាននិយាយថា ប្រទេសចិនសង្ឃឹមថា ប្រទេសបារាំងនឹងបន្តតួនាទីស្ថាបនា ដើម្បីធ្វើឲ្យទំនាក់ទំនងចិន-អឺរ៉ុបកាន់តែប្រសើរឡើងប្រកបដោយភាពរឹងមាំ និងស្ថិរភាព ដោយបង្កើនការជឿទុកចិត្តគ្នាទៅវិញទៅមក និងលើកកម្ពស់ការធ្វើសមាហរណកម្មផលប្រយោជន៍។

យោងតាមសេចក្តីថ្លែងការណ៍របស់ក្រសួងការបរទេសចិន នៅថ្ងៃពុធ (ទី២១ ខែកុម្ភៈ) បានឲ្យដឹងថា នៅក្នុងជំនួបជាមួយប្រធានាធិបតីបារាំងលោក Emmanuel Macron កាលពីថ្ងៃអង្គារ (ទី២០ ខែកុម្ភៈ) លោក Wang បាននិយាយថា ប្រទេសចិនសង្ឃឹមថា នឹងធ្វើការរួមគ្នាជាមួយបារាំង ក្នុងនាមជាកម្លាំងរក្សាស្ថិរភាពពិភពលោក។ លោក Wang បាននិយាយថា៖ «យើងមានឆន្ទៈធ្វើការជាមួយប្រទេសបារាំង ដើម្បីគាំទ្រដល់បំណងប្រាថ្នាដើមរបស់ពួកយើង ដោយបន្តការយកចិត្តទុកដាក់ និងធ្វើឲ្យកិច្ចសហប្រតិបត្តិការកាន់តែស៊ីជម្រៅ»។

ជាមួយគ្នានេះ លោក Wang ក៏បាននិយាយផងដែរថា ប្រទេសចិនសង្ឃឹមថា ប្រទេសបារាំងនឹងបង្កើតបរិយាកាសធុរកិច្ចប្រកបដោយយុត្តិធម៌ និងត្រឹមត្រូវ សម្រាប់ក្រុមហ៊ុនចិន នៅទីនោះ ហើយផ្តល់នូវ «ជំនឿចិត្តវិជ្ជមាន ស្ថិរភាព និងរយៈពេលវែង»។

សម្រាប់ជំនួបដាច់ដោយឡែកមួយរវាងលោក Wang និងទីប្រឹក្សាកិច្ចការបរទេសរបស់ប្រធានាធិបតីបារាំង ទីភ្នាក់ងារសារព័ត៌មានផ្លូវការ Xinhua បានរាយការណ៍ថា ភាគីទាំង២ មានការប្រាស្រ័យទាក់ទងគ្នាយ៉ាងស៊ីជម្រៅលើបញ្ហាទាក់ទងនឹងសន្តិភាព និងសន្តិសុខ ហើយបានព្រមព្រៀងគ្នាថា «ការពាក់ព័ន្ធគ្នាពហុភាគី គឺជារឿងមិនអាចខ្វះបាននោះទេ សម្រាប់សន្តិភាព និងស្ថិរភាព»៕