ភ្នំពេញ៖ សម្ដេចតេជោ ហ៊ុន សែន ប្រធានគណបក្សប្រជាជនកម្ពុជា ដែលកំពុងដឹកនាំប្រទេសកម្ពុជា បានថ្លែងថា គន្លឹះសំខាន់មួយសម្រាប់ជួយសង្គ្រោះអាយុជីវីតមនុស្សជាតិពីការឆ្លងរីករាលដាលនៃមេរោគកូវីដ-១៩ គឺការចែករំលែកវ៉ាក់សាំងបង្ការជំងឺនេះតាមរយៈគោលការណ៍មួយដែលសម្ដេចហៅថា «វ៉ាក់សាំងពហុភាគីនិយម»។
សម្ដេចតេជោ ហ៊ុន សែន បានថ្លែងបែបនេះនៅក្នុងកិច្ចប្រជុំកំពូលរវាងថ្នាក់ដឹកនាំបក្សកុម្មុយនីស្តចិន និងគណបក្សនយោបាយលើពិភពលោក ដែលត្រូវបានធ្វើឡើងតាមប្រព័ន្ធអនឡាញនៅយប់នេះ។
នៅក្នុងសុន្ទរកថា សម្ដេចតេជោ ហ៊ុន សែន បានផ្ដល់នូវទស្សនទានមួយចំនួន ដោយក្នុងសម្ដេចលើកឡើងថា ពិភពលោកកំពុងប្រយុទ្ធនឹងការឆ្លងរីករាលដាលនៃមេរោគកូវីដ-១៩ ដើម្បីសង្គ្រោះអាយុជីវិតមនុស្សជាតិ។
សម្ដេចតេជោ ហ៊ុន សែន បញ្ជាក់ថា គន្លឹះមួយដើម្បីសម្រេចគោលដៅនៃការជួយសង្គ្រោះអាយុជីវិតមនុស្ស គឺតាមរយៈការបែងចែកវ៉ាក់សាំងបង្ការជំងឺកូវីដ-១៩។
សម្ដេចតេជោ ហ៊ុន សែន ថ្លែងថា៖ «គន្លឹះដ៏សំខាន់មួយនៃកិច្ចប្រឹងប្រឹងដើម្បីគោលដៅនេះ គឺការបែងចែកវ៉ាក់សាំង និងការចាត់ទុកវ៉ាក់សាំងជាទំនិញសាធារណៈដោយប្រកាន់យកនូវគោលការណ៍«វ៉ាក់សាំងពហុភាគីនិយម»ទាំងក្នុងដំណើរការផលិត ចែកចាយ និងប្រើប្រាស់»។
ទន្ទឹមគ្នានេះ សម្ដេចតេជោ ហ៊ុន សែន បានថ្លែងអរគុណដល់ប្រទេសចិនដែលបានផ្ដល់អាទិភាពដល់កម្ពុជាសម្រាប់ទទួលបានវ៉ាក់សាំងបង្ការជំងឺកូវីដ-១៩នៅក្នុងស្មារតីមិត្តភាព និងសាមគ្គីភាពដោយគ្មានលក្ខខណ្ឌ ដែលស្របនឹងពាក្យស្លោកថា «មិត្តល្អជួយគ្នាក្នុងគ្រាមានអាសន្ន»៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
