នៅថ្ងៃពុធនេះ រដ្ឋមន្រ្តីក្រសួងកសិកម្មឥណ្ឌាលោក Arjun Munda បានអំពាវនាវឲ្យប្រជាកសិករធ្វើបាតុកម្ម ពិភាក្សាការទាមទាររបស់ពួកគេតាមរយៈតុចរចា នៅជុំទី ៥ ស្របពេលភាពទាល់ច្រកកើតមាន ។

ក្រុមកសិករ បានច្រានចោលសំណើរកាលពីមុនរបស់រដ្ឋាភិបាលដែលបានផ្តល់ជូនកាលពីថ្ងៃចន្ទ សម្រាប់កិច្ចសន្យារយៈពេល ៥ឆ្នាំ និងការធានាដល់តម្លៃគាំទ្រសម្រាប់ផលិតរបស់ពួកគេ ដូចជាពោត កប្បាស និងគ្រាប់ធុញ្ញជាតិ ។

ក្រុមប្រជាកសិករ បានជួបជុំគ្នានៅព្រំដែនរដ្ឋភាគខាងជើង Punjab និងរដ្ឋ Haryana ដោយមានពាក់ម៉ាស់ ដងស្ទួច ត្រាក់ទ័រ និងគ្រឿងចក្រធុនធ្ងន់ជាច្រើនទៀត ដើម្បីចាប់ផ្តើមការតវ៉ារបស់ពួកគេទៅកាន់រដ្ឋធានីញូវដែល្លី ។

កាលពីល្ងាចថ្ងៃអង្គារ ស្នងការរដ្ឋ Haryana បានបញ្ជាឲ្យរឹបអូសបន្ទាន់សម្ភារៈធុនធ្ងន់ដែលនាំយកដោយក្រុមកសិករ ដើម្បីកុំឲ្យពួកគេប្រើប្រាស់ដើម្បីបំផ្លាញប៉ារ៉ាស់ ។

ក្រុមនគរបាលបានស្នើសុំផងដែរដល់ម្ចាស់សម្ភារៈបែបនេះ កុំឲ្យខ្ចី ឬជួលដល់ក្រុមបាតុករ ហើយការប្រើប្រាស់ដើម្បីធ្វើឲ្យប៉ះពាល់ដល់កងកម្លាំងសន្តិសុខ នឹងក្លាយជាការបទឧក្រិដ្ឋ ។

សូមបញ្ជាក់ថា ក្រុមប្រជាកសិករដែលមកពីរដ្ឋភាគខាងជើង Punjab ពុំអាចទប់កំហឹងរបស់ពួកគេបានឡើយចំពោះការចុះថោកផលិតផលកសិកម្មរបស់ពួកគេ និងគ្មានការគាំទ្ររបស់រដ្ឋាភិបាល នៅមុនការបោះឆ្នោតសកល ដែលគ្រោងនឹងរៀបចំឡើងនៅខែឧសភាខាងមុខនេះ ៕