ភ្នំពេញ ៖សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា មានប្រសាសន៍បញ្ជាក់ថា គ្រឹះ និងរចនាសម្ព័ន្ធនៃសេដ្ឋកិច្ចរបស់កម្ពុជា បានពឹងផ្អែកទៅលើវិស័យឯកជនជាកម្លាំងស្នូល ហើយនៅក្នុងវិស័យឯកជននោះគឺសហគ្រាសធនតូច និងមធ្យម (SME)នេះហើយដែលបានចូលរួមលើកកម្ពស់សេដ្ឋកិច្ចជាតិ បង្កើតការងារដល់ប្រជាពលរដ្ឋច្រើនគេ។

​សម្ដេចធិបតី នាយករដ្ឋមន្រ្ដី មានប្រសាសន៍បញ្ជាក់បែបនេះក្នុងឱកាសអញ្ជើញជាធិបតីសម្ពោធដាក់ឱ្យប្រើប្រាស់ជាផ្លូវការអគារ «តេជោសែន» និងពិធីបិទ សន្និបាតបូកសរុបលទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។

សម្ដេចធិបតីថ្លែងថា វិស័យឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ ត្រូវបានចាត់ទុកជាកម្លាំងចលករមួយក្នុងការជំរុញដល់កំណើនសេដ្ឋកិច្ច ដោយបានដើរតួនាទីយ៉ាងសំខាន់ នៅក្នុងការបង្កើតការងារ និងបង្កើនប្រាក់ចំណូលជូនប្រជាជនកម្ពុជា។ វិស័យនេះបាននិងកំពុងមានការអភិវឌ្ឍឈានទៅមុខប្រកបដោយថាមវន្ត មានលក្ខណៈចម្រុះសម្បូរបែប ផ្តោតលើទំនួលខុសត្រូវខាងបរិស្ថាន និងសង្គមខ្ពស់ ហើយពង្រីកបាននូវអន្តរកម្មសេដ្ឋកិច្ច រវាងផ្នែកកែច្នៃ នវានុវត្តន៍ កម្មន្តសាល ជាមួយវិស័យកសិកម្ម ពាណិជ្ជកម្ម និងសេវាកម្ម ដើម្បីជំរុញសមាហរណកម្មសេដ្ឋកិច្ច ខ្សែច្រវាក់តម្លៃ និងភាពប្រកួតប្រជែងរបស់កម្ពុជា ទាំងនៅក្នុងតំបន់ និងនៅលើពិភពលោក។

សម្ដេចធិបតីនាយករដ្ឋមន្រ្ដីបានមានប្រសាសន៍បញ្ជាក់ថា នៅប្រទេសអ្នកមាន ៩៥ ភាគរយនៃក្រុមហ៊ុនទាំងអស់នៅក្នុងប្រទេសនោះ គឺជាប្រភេទក្រុមហ៊ុន SME។ ចំណែកនៅក្នុងប្រទេសកម្ពុជា ៩៩ ភាគរយ ក៏ជាប្រភេទក្រុមហ៊ុន SME នេះដែរ៕ 

អត្ថបទ៖ វ៉ន ដារ៉ា