ភ្នំពេញ៖ សម្ដេចតេជោ ហ៊ុន សែន ប្រធានគណបក្សប្រជាជនកម្ពុជាដែលកំពុងគ្រប់គ្រង និងដឹកនាំប្រទេសកម្ពុជា បានថ្លែងបញ្ជាក់ថា សម្ដេចនៅតែបន្តគាំទ្រដល់«គំនិតផ្ដួចផ្ដើមខ្សែក្រវាត់ និងផ្លូវ» ដោយចាត់ទុកថា ជាយន្តការមួយសម្រាប់ជំរុញការស្ដារសេដ្ឋកិច្ចឡើងវិញនៅក្រោយវិបត្តិកូវីដ-១៩។
សម្ដេចតេជោ ហ៊ុន សែន បានថ្លែងបែបនេះនៅក្នុងកិច្ចប្រជុំកំពូលរវាងថ្នាក់ដឹកនាំបក្សកុម្មុយនីស្តចិន និងគណបក្សនយោបាយលើពិភពលោក ដែលត្រូវបានធ្វើឡើងតាមប្រព័ន្ធអនឡាញនៅយប់នេះ។
ក្នុងសុន្ទរកថាថ្លែងទៅកាន់មេដឹកនាំគណបក្សនយោបាយនានាជុំវិញពិភពលោក សម្ដេចតេជោ ហ៊ុន សែន បានមានប្រសាសន៍ថា ប្រទេសនានានឹងត្រូវស្ដារសេដ្ឋកិច្ច និងសង្គមឡើងវិញ ក្រោយពីវិបត្តិសុខភាពសកល ថមថយទៅវិញនាពេលខាងមុខ។
សម្ដេចតេជោ ហ៊ុន សែន បានបញ្ជាក់ថា ការស្ដារសេដ្ឋកិច្ចឡើងវិញក្រោយវិបត្តិកូវីដ-១៩នេះ ទាមទារឱ្យលើកកម្ពស់យន្តការទ្វេភាគី និងពហុភាគីនិយម ក្នុងនោះមានទាំង «គំនិតផ្ដួចផ្ដើមខ្សែក្រវាត់ និងផ្លូវ» ដែលជាផែនការអភិវឌ្ឍន៍សេដ្ឋកិច្ចផ្ដួចផ្ដើមឡើងដោយប្រទេសចិន។
សម្ដេចតេជោ ហ៊ុន សែន ថ្លែងថា៖ «ខ្ញុំសូមសម្ដែងជាថ្មីម្ដងទៀតនូវការគាំទ្រយ៉ាងមុតមាំចំពោះគំនិតផ្ដួចផ្ដើមខ្សែក្រវាត់ និងផ្លូវ ដែលនឹងនាំមកនូវវិបុលភាព និងសុភមង្គលជូនដល់ប្រជាជននៅក្នុងបណ្ដាប្រទេស និងតំបន់ ស្ថិតក្រោមវិសាលភាពនៃគំនិតផ្ដួចផ្ដើមនេះ នៅក្នុងបរិបទនៃការងើបឡើងវិញនៃសង្គម-សេដ្ឋកិច្ច ក្រោយពីវិបត្តិនៃជំងឺកូវីដ-១៩បានស្រាកស្រាន្ត»។
វិបត្តិសុខភាពលសកលដែលបណ្ដាលមកពីការឆ្លងរីករាលដាលនៃមេរោគកូវីដ-១៩ បានអូសបន្លាយអស់រយៈពេលជាង ១ឆ្នាំកន្លះរួចមកហើយ ដែលធ្វើឱ្យសេដ្ឋកិច្ចពិភពលោក ព្រមទាំងកម្ពុជាផងដែរ ស្ថិតក្នុងស្ថានភាពធ្លាក់ចុះ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
