នាយករដ្ឋមន្រ្តីបារាំងលោក Gabriel Attal បាននិយាយនៅថ្ងៃពុធនេះថា រដ្ឋាភិបាលរបស់លោកនឹងរៀបចំច្បាប់ថ្មីនៅរដូវក្តៅនេះ ដើម្បីការពារល្អប្រសើរជាងនេះដល់ប្រាក់ចំណូលរបស់ប្រជាកសិករ និងពង្រឹងគោលជំហររបស់ពួកគេ ក្នុងកិច្ចចរចាជាមួយក្រុមហ៊ុនលក់រាយ និងក្រុមហ៊ុនលក់ទំនិញប្រើប្រាស់ ។

លោក Attal បានប្រកាសបែបនេះ ពេលធ្វើបច្ចុប្បន្នភាពច្បាប់ថ្មី Egalim នៅក្នុងសុន្ទរកថាចុងក្រោយរបស់លោកដែលមានគោលបំណងបន្ធូរបន្ថយភាពតានតឹងជាមួយក្រុមប្រជាកសិករខឹងសម្បារ មុនពិព័រណ៍ពាណិជ្ជកម្មកសិកម្មដែលនឹងចាប់ផ្តើមនៅចុងសប្តាហ៍នេះ ។

គួរឲ្យដឹងថា បាតុកម្មបានផ្ទុះនៅតាមបណ្តាប្រទេសជាច្រើនក្នុងអឺរ៉ុប រួមទាំងនៅបែលហ្ស៊ិក ក្រិក និងអាល្លឺម៉ង់ ធ្វើឲ្យមានភាពតានតឹងជុំវិញផលប៉ះពាល់ដល់ការធ្វើកសិកម្មបណ្តាលមកពីកិច្ចខិតខំរបស់សហភាពអឺរ៉ុប ក្នុងការដោះស្រាយបញ្ហាបម្រែបម្រួលអាកាសធាតុ ។

នៅប្រទេសបារាំង ប្រជាកសិករ បានផ្អាកការតវ៉ាភាគច្រើនរបស់ពួកគេ បន្ទាប់ពីមានការបិទផ្លូវហាយវ៉េ និងការសន្យាចំពោះវិធានការថ្មីរបស់លោក Attal កាលពីថ្ងៃទី ១ ខែកុម្ភៈ ។

ប៉ុន្តែក្រុមកសិករដែលនិយាយថា ពួកគេពុំទទួលបានការចំណាយគ្រប់គ្រាន់ និងវ័ន្តក.ដោយសារពន្ធ ច្បាប់បរិស្ថាន និងប្រឈមការប្រកួតប្រជែងមិនយុត្តិធម៌ពីបរទេស បានជំរុញឲ្យរដ្ឋាភិបាលបង្ហាញលទ្ធផលដំបូងនៃវិធានការសង្រ្គោះបន្ទាន់របស់ពួកគេ មុនពិព័រណ៍ពាណិជ្ជកម្មកសិកម្ម ៕