រដ្ឋមន្ត្រីការពារជាតិរុស្ស៊ី លោក Sergei Shoigu បាននិយាយថា សហព័ន្ធរុស្ស៊ី មិនមានផែនការដាក់ពង្រាយអាវុធនុយក្លេអ៊ែរ នៅក្នុងលំហអាកាសទេ។

នៅក្នុងបទសម្ភាសន៍ជាមួយសារព័ត៌មានTASS លោក Sergei Shoigu បាននិយាយថា ប្រទេសរុស្ស៊ី មិនបានដាក់ និងមិនមានផែនការដាក់ពង្រាយអាវុធនុយក្លេអ៊ែរ នៅក្នុងលំហអាកាសទេ។

នៅថ្ងៃទី១៤ ខែកុម្ភៈ វាត្រូវបានគេដឹងថា លោក Mike Turner ប្រធានគណៈកម្មាធិការចារកម្មសភាអាមេរិក បានបញ្ជូនព័ត៌មានចារកម្មអំពី«ការគំរាមកំហែងយ៉ាងធ្ងន់ធ្ងរដល់សន្តិសុខជាតិ» ដល់សមាជិកសភា។ ប្រភពសារព័ត៌មាន CNN បានអះអាងថា ការគំរាមកំហែងនេះ គឺទាក់ទងនឹងរុស្ស៊ី។

សារព័ត៌មាន ABC News ដែលបានដកស្រង់ប្រភពព័ត៌មានពីរ បានរាយការណ៍ថា៖«ការគំរាមកំហែងយ៉ាងធ្ងន់ធ្ងរដល់សន្តិសុខជាតិ»របស់សហរដ្ឋអាមេរិកទាក់ទងនឹងគោលបំណងរបស់រុស្ស៊ី ក្នុងការបាញ់បង្ហោះ អាវុធនុយក្លេអ៊ែរទៅក្នុងលំហ។

ក្រោយមក សារព័ត៌មានCNN បានរាយការណ៍ដោយដកស្រង់ប្រភពសន្តិសុខរបស់សហរដ្ឋអាមេរិកថា ការគំរាមកំហែងនេះ ទាក់ទងនឹងការអភិវឌ្ឍអាវុធនុយក្លេអ៊ែររបស់រុស្ស៊ីដែលមានសមត្ថភាព បង្កើតរលកថាមពល និងអាចបំផ្លាញផ្កាយរណបបានមួយចំនួនធំ។