នៅថ្ងៃពុធនេះ ប្រធានាធិបតីរុស្ស៊ីលោក Vladimir Putin បានផ្តល់គ្រឿងឥស្សរិយយសដល់អង្គភាពធ្វើសង្រ្គាមនៃកងកម្លាំងអាកាសសម្រាប់បេសកកម្មរបស់ពួកគេដែលជាប្រតិបត្តិការសឹកពិសេសនៅអ៊ុយក្រែន ។ 

ពិធីប្រគល់គ្រឿងឥស្សរិយយសនេះ ធ្វើឡើងនៅមូលដ្ឋានទ័ពអាកាស Chalovsky ស្ថិតនៅជិទីក្រុងម៉ូស្គូ ។

ថ្លែងនៅក្នុងពិធី លោក Putin បានកោតសរសើរដល់ភាពក្លាហានរបស់ក្រុមមន្រ្តី ក្នុងបុព្វហេតុយោធានៅក្នុងប្រទេសអ៊ុយក្រែន ។

លោកថា លោករីករាយនឹងប្រើប្រាស់ឱកាសមួយនេះ ផ្តល់គ្រឿងឥស្សរិយយសថ្នាក់រដ្ឋដល់អង្គភាពប្រយុទ្ធនៃកងទ័ពអាកាស ។

លោកបន្តថា ក្រុមមន្រ្តីទាំងនេះ បានចុះបេសកកម្មរាប់ពាន់លើក បញ្ជាក់ពីជំនាញយោធា ពេលពួកគេកំពុងបំពេញការងារ ។

លោក Putinបាននិយាយផងដែរថា កងទ័ពរុស្ស៊ី នឹងវាយរុញបន្ថែមទៀតចូលទៅក្នុងទឹកដីអ៊ុយក្រែន ដើម្បីកសាងភាពជោគជ័យរបស់ពួកគេនៅលើសមរភូមិ បន្ទាប់ពីការដួលរលំនៃទីក្រុងAvdiivka ជាទីដែលលោកបាននិយាយថា កងទ័ពអ៊ុយក្រែនត្រូវបានបង្ខំឲ្យភៀសខ្លួនក្នុងភាពវឹកវរ។

ទីក្រុងដែលធ្លាប់មានប្រជាជនរស់នៅចំនួន ៣២.០០០ នាក់នេះ បានធ្លាក់ក្រោមការគ្រប់គ្រងរបស់ប្រទេសរុស្ស៊ី កាលពីថ្ងៃសៅរ៍ ដែលជាជ័យជម្នះលើសមរភូមិដ៏ធំបំផុតរបស់លោក Putinចាប់តាំងពីកងកម្លាំងរុស្ស៊ី បានដណ្តើមយកទីក្រុង Bakhmut កាលពីខែឧសភា ឆ្នាំ២០២៣ ៕