សមាជិកព្រឹទ្ធសភាអាមេរិក លោក Chris Murphy បាននិយាយនៅថ្ងៃពុធនេះ ក្នុងអំឡុងដំណើរទស្សនកិច្ចទៅកាន់ប្រទេសទួរគី បន្ទាប់ពីមានការយល់ព្រមលើសំណើសុំចូលជាសមាជិកអង្កការណាតូ (NATO) របស់ប្រទេសស៊ុយអែតថា មានសន្ទុះគួរឲ្យកត់សម្គាល់នៅក្នុងទំនាក់ទំនងរវាងសហរដ្ឋអាមេរិក និងទួរគី។

ទំនាក់ទំនងរវាងពួកគេ មានភាពតានតឹងជាយូរណាស់មកហើយ ដោយបញ្ហាជាច្រើន ចាប់ពីប្រទេសទួរគី ទិញប្រព័ន្ធការពារមីស៊ីលS-400របស់រុស្ស៊ី ដល់ការគាំទ្ររបស់សហរដ្ឋអាមេរិកសម្រាប់កងជីវពលឃើដ នៅក្នុងប្រទេសស៊ីរី ដែលទីក្រុងអង់ការ៉ាចាត់ទុកថា ជាក្រុមភេរវករ និងបញ្ហាសិទ្ធិមនុស្សផ្សេងៗទៀត។

លោក Murphy បានប្រាប់សារព័ត៌មានរ៉យទ័រក្នុងបទសម្ភាសន៍មួយនៅទីក្រុងអ៊ីស្តង់ប៊ុល បន្ទាប់ពីកិច្ចពិភាក្សាក្នុងរដ្ឋធានីអង់ការ៉ា ជាមួយក្រុមមេដឹកនាំទួរគីថា៖«អ្នកប្រាកដជាមានអារម្មណ៍ថ្មី គោលបំណង និងអារម្មណ៍ល្អ នៅក្នុងទំនាក់ទំនង ហើយយើងមានការចាប់អារម្មណ៍ខ្លាំងណាស់ នៅក្នុងកិច្ចប្រជុំរបស់យើងកាលពីម្សិលមិញ»។

កាលពីសប្តាហ៍មុន លោកប្រធានាធិបតី តាយីប អេរដូហ្គែន(Tayyip Erdogan) ផ្ទាល់ បាននិយាយអំពីនិន្នាការវិជ្ជមានក្នុងទំនាក់ទំនងរវាងសម្ព័ន្ធមិត្តណាតូទាំងពីរ ជាមួយនឹងការលក់យន្តហោះចម្បាំង F-16 ទៅកាន់ឲ្យប្រទេសទួរគី នឹងបន្តទៅមុខ បន្ទាប់ពីខ្លួន បានផ្តល់សច្ចាប័នលើការចូលជាសមាជិកអង្គការណាតូរបស់ប្រទេសស៊ុយអែត បន្ទាប់ពីការពន្យារពេល ២០ខែ។

លោក Murphy និងសមាជិកព្រឹទ្ធសភា លោក Jeanne Shaheen បានជួបអេរដូហ្គែន និងរដ្ឋមន្ត្រីការបរទេសលោក ហាកាន ហ្វីដាន ( Hakan Fidan) ដើម្បីសម្តែងការដឹងគុណចំពោះការគាំទ្ររបស់ប្រទេសទួរគីលើបញ្ហានេះ និងដើម្បីពិភាក្សាអំពីអ្វីដែលនឹងកើតឡើងបន្ទាប់ទៀត។