មន្រ្ដីសុខាភិបាល បាននិយាយថា ជនជាតិប៉ាឡេស្ទីនជាច្រើននាក់ បានរត់ទៅកាន់កន្លែងកើតហេតុជាទីដែលលំនៅឋាននៃគ្រួសាររបស់លោកអាប៊ូ អាល់នួរ(Abu al-Noor បានរងការវាយប្រហារតាមអាកាសរបស់អ៊ីស្រាអែលនៅពេលយប់ នៅកណ្ដាលក្រុងរ៉ាហ្វាដែលបានសម្លាប់មនុស្ស៨នាក់។

ហានី សាលេម (Hani Salem)ជាអ្នកស្រុកនៅក្បែរលំនៅឋាននោះ បាននិយាយថា មិនមានកន្លែងសុវត្ថិភាពទេក្នុងក្រុងរ៉ាហ្វា ប្រជាជនកំពុងបាត់បង់ទីជម្រកក្នុងក្រុងរ៉ាហ្វា ពោលគឺអ្នកគ្រប់គ្នានៅជុំវិញយើង និងជិតខាងរបស់យើងកំពុងបាត់បង់ទីជម្រក ប៉ុន្ដែក្រុងរ៉ាហ្វាក៏មិនមានកន្លែងសុវត្ថិភាពដែរ។

មន្រ្ដីសុខាភិបាលប៉ាឡេស្ទីន បាននិយាយថា នៅពេលយប់ចូលមកដល់ ការវាយប្រហារតាមអាកាសរបស់ អ៊ីស្រាអែលពីរលើកក្នុងក្រុងរ៉ាហ្វា បានសម្លាប់មនុស្ស៦នាក់នៅកន្លែងជ្រកកោនចុងក្រោយរបស់អ្នកស្រុកហ្កាហ្សា ក្នុងមានពីរនាក់ដែលកំពុងធ្វើដំណើរតាមរថយន្ដផងដែរ។ ដោយឡែក គ្រូពេទ្យបឋមសង្គ្រោះ បាននិយាយថា មនុស្ស១២នាក់ បានស្លាប់ភាគច្រើនក្នុងចំណោមពួកគេ បានស្លាប់ ក្នុងអំឡុងពេលវាយប្រហារតាមអាកាសលើផ្ទះមួយខ្នងក្នុងក្រុង ដេ អាល់បាឡាស់។

សង្រ្គាមបានធ្វើមនុស្សភាគច្រើនក្នុងចំណោមមនុស្សតំបន់ហ៊ុមព័ទ្ធ២,៣លាននាក់ បាត់បង់ទីជម្រក ហើយក្នុងចំណោមពួកគេទាំងនោះ ឥឡូវនេះ កំពុងរស់នៅក្នុងជម្រករបស់អង្គការសហប្រជាជាតិ ឬសំពត់តង់ និងប្រកាសកាតុងនៅចុងខាងត្បូងតំបន់ហ៊ុមព័ទ្ធ និងនៅព្រំដែនជាប់ប្រទេសអេហ្ស៊ីប។

ក្រសួងសុខាភិបាលតំបន់ហ្កាហ្សា បាននិយាយនៅក្នុងសេចក្ដីថ្លែងការនៅថ្ងៃពុធនេះថា ជនជាតិប៉ាឡេស្ទីន ត្រូវបានសម្លាប់សរុបទាំងអស់មានចំនួន ២៩.៣១៣នាក់ និង៦៩.៣៣៣នាក់ទៀត បានរងរបួស ដោយការវាយប្រហាររបស់អ៊ីស្រាអែលលើតំបន់ហ្កាហ្សាតាំងពីថ្ងៃទី៧តុលាមកម៉្លេះ៕