ក្រុមរបស់លោក Prabowo Subianto នៅថ្ងៃពុធ (ទី២១ ខែកុម្ភៈ) នេះ បាននិយាយថា ផែនការរបស់អនាគតប្រធានាធិបតីថ្មីឥណ្ឌូនេស៊ី ដើម្បីផ្តល់អាហារថ្ងៃត្រង់ និងទឹកដោះគោដល់សាលារៀន ដោយឥតគិតថ្លៃ នឹងត្រូវចំណាយរហូតដល់ ១២០សែនកោដិរូពៀ (៧,៦៨ពាន់លានដុល្លារ) ក្នុងឆ្នាំដំបូងរបស់ខ្លួន។

លោក Prabowo បានប្រកាសពីជ័យជម្នះនៅក្នុងការបោះឆ្នោតប្រធានាធិបតី កាលពីសប្តាហ៍មុន នៅក្នុងប្រទេសកាន់លទ្ធិប្រជាធិបតេយ្យដ៏ធំបំផុតទី៣ របស់ពិភពលោក បន្ទាប់ពីការរាប់សន្លឹកឆ្នោតភ្លាមៗដោយអង្គភាពស្ទង់មតិឯករាជ្យ នៅក្នុងការិយាល័យបោះឆ្នោតគំរូជាច្រើន បានបង្ហាញថា លោកទទួលបានសំឡេងឆ្នោតជិត ៦០ភាគរយ។

គណៈកម្មាធិការរៀបចំការបោះឆ្នោតគ្រោងនឹងប្រកាសលទ្ធផលផ្លូវការនៅថ្ងៃទី២០ ខែមីនា ហើយរដ្ឋាភិបាលថ្មី នឹងចូលកាន់តំណែងនៅខែតុលា។

ពាក់ព័ន្ធនឹងផែនការរបស់លោក អ្នកវិភាគមួយចំនួនបានព្រមានថា ការចំណាយ ដើម្បីធ្វើតាមការសន្យាអំឡុងយុទ្ធនារបស់លោក Prabowo ដែលមានការផ្ដល់អាហារឥតគិតថ្លៃសម្រាប់កុមារ ៨២,៩លាននាក់ គឺខ្ពស់ណាស់ ហើយអាចបំផ្លាញកំណត់ត្រាបទប្បញ្ញត្តិសារពើពន្ធរបស់ប្រទេសឥណ្ឌូនេស៊ី។

ក្រុមរបស់លោកបាននិយាយថា កម្មវិធីនេះនឹងត្រូវចំណាយអស់ ៤៥០សែនកោដិរូពៀ (២៨,៧៩ពាន់លានដុល្លារ) នៅពេលដែលកម្មវិធីនោះឈានដល់ដំណាក់កាលចុងក្រោយ ក្នុងឆ្នាំ២០២៩៕