ភ្នំពេញ: អង្គភាពសេវាសាធារណៈគំរូ រួមមានសាលាបឋមសិក្សា ក៏ដូចជាសាលាអនុវិទ្យាល័យ និងមណ្ឌលសុខភាព នឹងត្រូវប្រកាសផ្ដល់ពានរង្វាន់ ដោយនាយករដ្ឋមន្ត្រី កម្ពុជា នៅព្រឹកថ្ងៃទី ២២ ខែ កុម្ភៈឆ្នាំ ២០២៤នេះ។ ជ័យលាភីទាំងនេះ ត្រូវបានឆ្លងកាត់ការវាយតម្លៃយ៉ាងសុក្រឹត្យប្រកបដោយតម្លាភាព ដោយគណៈកម្មការវាយតម្លៃអង្គភាពផ្ដល់សេវាសាធារណៈថ្នាក់ជាតិ នៃក្រសួងមុខងារសាធារណៈ។

សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃប្រទេសកម្ពុជា នៅព្រឹកថ្ងៃទី ២២ ខែ កុម្ភៈ ឆ្នាំ ២០២៤នេះ នឹងអញ្ជើញចូលរួមជាអធិបតីផ្ដល់ពានរង្វាន់ ជូនជ័យលាភីអង្គភាពសេវាសាធារណៈគំរូ រួមមានសាលាបឋមសិក្សាគំរូ អនុវិទ្យាល័យគំរូ និងមណ្ឌលសុខភាពគំរូសម្រាប់ឆ្នាំ ២០២៣។

មុននឹងឈានដល់ការប្រកាសលទ្ធផលជ័យលាភី ក្រសួងមុខងារសាធារណៈ នៅថ្ងៃទី ២១ ខែកុម្ភៈ ក៏បានរៀបចំសិក្ខាសាលាចែករំលែកបទពិសោធន៍នៃការគ្រប់គ្រងនិងការផ្ដល់សេវាសាធារណៈគំរូ។ សិក្ខសាលានេះ មានការធ្វើបទបង្ហាញដោយផ្ទាល់ដោយ បេក្ខភាពសាលាបឋមសិក្សាគំរូ អនុវិទ្យាល័យគំរូ និងមណ្ឌលសុខភាពគំរូផងដែរ។

ក្នុងឱកាសបិទសិក្ខាសាលា ឯកឧត្តម ឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈ បានមានប្រសាសន៍ថា អង្គភាពសេវាសាធារណៈគំរូ គឺជាអង្គភាពដែលមានលក្ខណៈសម្បត្តិឆ្លើយតបទៅនឹង នៃលក្ខណៈវិនិច្ឆ័យ វាយតម្លៃយ៉ាងហ្មត់ចត់ និងច្រើនដំណាក់កាល ប្រកបដោយការទទួលខុសត្រូវ សុចរិតភាព តម្លាភាព និងវិជ្ជាជីវៈកម្រិតខ្ពស់។

លើសពីនេះ ការដាក់ឱ្យដំណើរការនៃការវាយតម្លៃ និងទទួលស្គាល់អង្គភាពផ្ដល់សេវាសាធារណៈគំរូ មិនកំណត់ត្រឹមពានរង្វាន់ និងជ័យលាភីនោះទេ។ វាជាការសិក្សាស្វែងយល់ពីការគ្រប់គ្រង និងការផ្ដល់សេវារបស់បណ្ដាបេក្ខភាពដោយខ្លួនឯង, ការយកចិត្តទុកដាក់បន្ថែមទៀត និងការព្យាយាមកែលម្អជាបន្តបន្ទាប់នូវគុណភាព និងប្រសិទ្ធភាព ជាពិសេសការពេញចិត្តពីអ្នកទទួលសេវា។ ទាំងនេះជាជោគជ័យរួមរបស់បេក្ខភាពប្រកួតប្រជែងទាំងអស់ ព្រោះថាសេវាល្អរបស់អង្គភាព គឺជាមោទនភាពរបស់ថ្នាក់ដឹកនាំ និងមន្ត្រីរបស់អង្គភាព និងក៏ជាកិត្តិយសរបស់សហគមន៍ និងសង្គមជាតិយើងទាំងមូល។

ឯកឧត្តម ឧបនាយករដ្ឋមន្ត្រីបន្តថា រាជរដ្ឋាភិបាលកម្ពុជាក្នុងនីតិកាលទី៧ បានបន្តផ្តល់ការយកចិត្តទុកដាក់ និងជំរុញបន្ថែមចលនានៃការប្រឡងប្រណាំង តាមរយៈការវាយតម្លៃ និងទទួលស្គាល់អង្គភាពផ្តល់សេវាសាធារណៈគំរូក្នុងវិស័យអប់រំ និងវិស័យសុខាភិបាល។ វាជាផ្នែកមួយនៃការឆ្លើយតបទៅនឹងយុទ្ធសាស្ត្របញ្ចកោណ ដំណាក់កាលទី១ ដើម្បីកំណើន ការងារ

សមធម៌ ប្រសិទ្ធភាព និងចីរភាព សំដៅកសាងមូលដ្ឋានគ្រឹះឆ្ពោះទៅសម្រេចបាននូវចក្ខុវិស័យកម្ពុជាឆ្នាំ២០៣០ ជាប្រទេសដែលមានចំណូលមធ្យមកម្រិតខ្ពស់ និងឆ្នាំ២០៥០ ជាប្រទេសដែលមានចំណូលខ្ពស់។

តាមរយៈអនុក្រឹត្យស្ដីពី ការវាយតម្លៃ និងការទទួលស្គាល់អង្គភាពផ្ដល់សេវាសាធារណៈក្នុងវិស័យអប់រំនិងវិស័យសុខាភិបាល បានបញ្ជាក់ដែរថា អង្គភាពសេវាសាធារណៈគំរូលេខ ១ទទួលបានប្រាក់រង្វាន់ ២០០លានរៀល លេខទី២ទទួលបាន ១៥០លានរៀល លេខ៣ទទួលបាន ១០០លានរៀល លេខ៤ទទួលបាន ៨០លានរៀល លេខ៥ទទួលបាន ៦០លានរៀល ចំណែកឯអង្គភាពសេវាសាធារណៈគំរូលំដាប់លេខ ៦ដល់លេខ ១០ទទួលបាន ៤០លានរៀល។ ថវិការ ៦០% នៃថវិការង្វាន់សរុប គឺប្រើប្រាស់សម្រាប់ការលើកទឹកចិត្ត មន្ត្រីបម្រើការងារក្នុងអង្គភាព រីឯថវិកា ៤០%ទៀត ប្រើប្រាស់សម្រាប់ការអភិវឌ្ឍអង្គភាព។

អត្ថបទ៖ គឹមហុក