ស៊ីហ្គេម៖ គណៈកម្មាធិការជាតិរៀបចំការប្រកួតស៊ីហ្គេមលើកទី៣២ ឆ្នាំ២០២៣ (CAMSOC) បានធ្វើការជំរុញឲ្យមានការប្រមូលផ្ដុំឡើងវិញ ក្រោមរបត់ថ្មីនៃវិបត្តិកូវីដ-១៩ ដើម្បីពង្រឹងការអភិវឌ្ឍកីឡាជំនាញកម្រិតខ្ពស់ ត្រៀមឆ្ពោះទៅរកការប្រកួតកីឡាស៊ីហ្គេមឆ្នាំ២០២១ នៅប្រទេសវៀតណាម ពិសេសស៊ីហ្គេមឆ្នាំ២០២៣ នៅប្រទេសកម្ពុជា ដ្បិតការហ្វឹកហាត់តាមអនឡាញមិនមានប្រសិទ្ធភាពក្នុងការបង្កើនគុណផលកីឡាឡើយ។
នេះបើតាមប្រសាសន៍របស់ឯកឧត្ដម វ៉ាត់ ចំរើន អគ្គលេខាធិការគណៈកម្មាធិការជាតិ CAMSOC ក្រោយបញ្ចប់កិច្ចប្រជុំប្រចាំសប្ដាហ៍របស់គណៈអចិន្ដ្រៃយ៍ CAMSOC ដែលដឹកនាំដោយឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាអនុប្រធានអចិន្ដ្រៃយ៍ CAMSOC ដើម្បីពិនិត្យរបាយការណ៍វឌ្ឍនភាពការងាររបស់គណៈកម្មការកីឡា និងបទបញ្ញត្តិ និងការអភិវឌ្ឍគុណផលកីឡាកាលពីថ្ងៃទី៦ ខែកក្កដា ឆ្នាំ២០២១។ ឯកឧត្ដម វ៉ាត់ ចំរើន បញ្ជាក់ថា វិបត្តិកូវីដ-១៩ បានធ្វើឲ្យប៉ះពាល់ដល់ផែនការប្រមូលផ្ដុំហ្វឹកហាត់របស់ក្រុមជម្រើសជាតិ តែយើងមិនអាចផ្ដេកផ្ដួលតាមស្ថានភាពនោះទេ ព្រោះពេលវេលាសល់កាន់តែខ្លី។ ដូច្នេះត្រូវមានយន្ដការជំរុញការហ្វឹកហាត់ទាំងក្នុងប្រទេស និងក្រៅប្រទេសដើម្បីធានាបាននូវការអភិវឌ្ឍគុណផលកីឡាកម្រិតខ្ពស់ ខណៈ CAMSOC នឹងរៀបចំការបោះជំរំហ្វឹកហាត់ទាំងក្នុង និងក្រៅប្រទេសឆាប់ៗខាងមុខ។
ចំពោះយន្ដការត្រូវអនុវត្តក្នុងឆមាសទី២ នៃឆ្នាំ២០២១ ទី១-បញ្ជូនកីឡាករ-កីឡាការិនីទៅហ្វឹកហាត់រយៈពេលវែងនៅប្រទេសចិនចំនួន ១៣៥នាក់លើ ១២ប្រភេទកីឡា។ ទី២-បញ្ជូនប្រភេទកីឡាមួយចំនួន ដែលមិនបានទៅហាត់នៅចិនឲ្យចេញទៅហាត់នៅប្រទេសផ្សេងៗ និងទី៣-តាមដាន ត្រួតពិនិត្យ និងវាយតម្លៃជាប់ជានិច្ចចំពោះកីឡាករ-កីឡាការិនីខ្មែរនៅក្រៅប្រទេស ដើម្បីពង្រឹងការអភិវឌ្ឍកីឡាកម្រិតខ្ពស់សម្រាប់ពួកគេ។ ក្រៅពីនេះ CAMSOC ក៏នឹងធ្វើការជាមួយមជ្ឈមណ្ឌលជាតិហ្វឹកហ្វឺនកីឡា ដើម្បីរៀបចំការបោះជំរំហ្វឹកហាត់នៅពហុកីឡដ្ឋានជាតិមរតកតេជោនាពេលឆាប់ៗខាងមុខ បន្ទាប់ពីការរៀបចំវិធានការទប់ស្កាត់ជំងឺកូវីដ-១៩ ដោយផ្ដើមពីកីឡាប្រមាណ ១៥ប្រភេទ។ ចំណែកកីឡាមួយចំនួនទៀត ត្រូវបានលើកទឹកចិត្តឲ្យបិទទ្វារហ្វឹកហាត់តាមសហព័ន្ធ ឬក្លិបដែលមានសុវត្ថិភាព ព្រោះការហ្វឹកហាត់តាមអនឡាញមិនមានប្រសិទ្ធភាពអភិវឌ្ឍន៍កីឡាកម្រិតខ្ពស់នោះទេ បានត្រឹមរក្សានូវសុខភាព តែមិនអាចបង្កើនគុណផលកីឡាឡើយ។ នេះបើតាមការបញ្ជាក់បន្ថែមរបស់ឯកឧត្តម វ៉ាត់ ចំរើន៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
