សមាជិកគណៈរដ្ឋមន្រ្តីសង្រ្គាមអ៊ីស្រាអែល លោក បេននី ហ្កាន់ស៍ (Benny Gantz) បាននិយាយកាលពីថ្ងៃពុធ (២១ កុម្ភៈ) ថាមាន «សញ្ញាវិជ្ជមានដំបូងនៃវឌ្ឍនភាព» លើកិច្ចព្រមព្រៀងថ្មីមួយ ដើម្បីដោះលែងចំណាប់ថ្នូរចេញពីតំបន់ហ្កាហ្សា ស្របពេលមានកិច្ចចរចាក្នុងតំបន់ដើម្បីទទួលបានការផ្អាកនៅក្នុងសង្គ្រាមដ៏បង្ហូរឈាមនេះ។

លោក ហ្កាន់ស៍ បាននិយាយនៅក្នុងសន្និសីទសារព័ត៌មានតាមទូរទស្សន៍មួយថា «មានការប៉ុនប៉ងជាបន្តបន្ទាប់ដើម្បីលើកកម្ពស់កិច្ចព្រមព្រៀងចំណាប់ថ្នូរថ្មីមួយ ហើយមានសញ្ញាវិជ្ជមានដំណាក់កាលដំបូងដែលអាចបង្កើតជាការវិវត្តន៍ថ្មី។ យើងនឹងមិនឈប់ស្វះស្វែងរកមធ្យោបាយ នឹងមិនខកខានឱកាសណាមួយក្នុងការនាំពលរដ្ឋយើងត្រឡប់មកវិញនោះទេ»។

សមាជិកគណៈរដ្ឋមន្រ្តីសង្រ្គាមរូបនេះបានបន្ថែមថា ប្រសិនបើមិនមានកិច្ចព្រមព្រៀងថ្មីណាមួយត្រូវបានសម្រេចទេ យោធាអ៊ីស្រាអែល នឹងបន្តការប្រយុទ្ធគ្នានៅតំបន់ហ្កាហ្សា ហើយក៏នឹងបន្តប្រយុទ្ធក្នុងខែដ៏ពិសិដ្ឋរបស់មូស្លីមនៃបុណ្យរ៉ាម៉ាដាន ដែលចាប់ផ្តើមនៅខែក្រោយនេះផងដែរ»។

ការចរចាកិច្ចព្រមព្រៀងចំណាប់ថ្នូរជាច្រើនសប្តាហ៍មិនទទួលបានលទ្ធផលជោគជ័យទេ ដោយអ៊ីស្រាអែលបានច្រានចោលការទាមទាររបស់ក្រុមហាម៉ាស សម្រាប់ការបញ្ឈប់សង្គ្រាម និងការដកខ្លួនរបស់អ៊ីស្រាអែលចេញពីហ្កាហ្សា ជាថ្នូរនឹងការដោះលែងចំណាប់ថ្នូរបន្ថែមទៀត ដោយនិយាយថាការទាមទារនោះជារឿងស្រមើលស្រម៉ៃរបស់ក្រុមហាម៉ាស៕