មន្ទីរពេទ្យកុមារអង្គរ ជាអង្គការក្រៅរដ្ឋាភិបាលមិនស្វែងរកប្រាក់ចំណេញ ដែលមាន​ទីតាំង​ស្ថិត​នៅ​ខេត្ត​សៀមរាប។ ចាប់តាំងពីឆ្នាំ១៩៩៩ រហូតមកដល់បច្ចុប្បន្ននេះ មន្ទីរពេទ្យកុមារអង្គរ បាន​ផ្តល់​ការ​ពិនិត្យ ព្យាបាល និងថែទាំសុខភាព សង្គ្រោះអាយុជីវិតដល់កុមារចំនួនជាង ២,៥លានករណី។

ក្នុងឱកាសអបអរសាទរខួបគម្រប់ ២៥ឆ្នាំ នៅរសៀលថ្ងៃទី២១ ខែកុម្ភៈនេះ មន្ទីរពេទ្យកុមារអង្គរ បាន​ឲ្យ​ដឹងថា ក្រៅ​ពីជាមន្ទីរពេទ្យឈានមុខមួយក្នុងការផ្តល់ការពិនិត្យ ព្យាបាល និងថែទាំ ដោយ​ឯកទេស​ក្នុង​ប្រទេសកម្ពុជា ក៏ជាមជ្ឈមណ្ឌលបណ្តុះបណ្តាលដ៏ឧត្តុង្គឧត្តមមួយ សំរាប់​មន្ត្រី​សុខាភិបាល​ជំនាន់​ក្រោយ ដែលគិតមកដល់ពេលនេះ បានបណ្តុះបណ្តាល ប្រមាណ ៧៨​ម៉ឺន​ជា​វត្តមាន ដល់និស្សិតវេជ្ជសាស្ត្រ និងមន្ត្រីសុខាភិបាលទាំងក្នុង និងក្រៅមន្ទីរពេទ្យ។ លើស​ពី​នេះ​ទៀត ក៏បានអប់រំសុខភាពដល់ប្រជាពលរដ្ឋនៅតាមសហគមន៍ សិស្សានុសិស្ស និងមន្ត្រីភូមិ ឃុំ ​នៅ​ក្នុងខេត្តសៀមរាប និងព្រះវិហារ ចំនួនប្រមាណ ១,៥លានវត្តមាន។

វេជ្ជបណ្ឌិត ងួន ច័ន្ទភក្ត្រា នាយកមន្ទីរពេទ្យកុមារអង្គរ បានសម្តែងនូវការថ្លែងអំណរគុណ និងដឹង​គុណចំ​ពោះបុគ្គលិក អ្នកស្ម័គ្រចិត្ត ម្ចាស់ជំនួយ ដៃគូ និងអ្នកគាំទ្រទាំងអស់ ដែលបានចូល​រួម​ចំណែក​សម្រេច​នូវកិច្ចកាងាររបស់មន្ទីរពេទ្យកុមារអង្គរ។ លោក បានបន្តថា ទោះបីជាមានការ​ប្រឈម​មុខ​នឹងបញ្ហា និងការលំបាកជាច្រើននាពេលកន្លងមក ប៉ុន្តែក្រុមការងារទាំងអស់ តែង​តែ​តស៊ូ​ដោយ​ភាពក្លាហាន និងក្តីមេត្តាករុណា។

លោកបាន​អំពាវនាវដល់សប្បុរសជន បណ្តាក្រុមហ៊ុន និងស្ថាប័នទាំងអស់ បន្តការបិរច្ចាគ និង​គាំទ្រ​មក​កាន់មន្ទីរពេទ្យកុមារអង្គរ ជាពិសេសនៅក្នុងយុទ្ធនាការរៃអង្គាស ដែលនឹងប្រព្រឹត្តទៅ ចាប់​ពីថ្ងៃទី៤ ដល់ថ្ងៃទី២២ ខែមីនា ឆ្នាំ២០២៤ ដើម្បីស្វែងរកមូលនិធិ ដើម្បីកសាងមជ្ឈមណ្ឌល រង​របួស និងប៉ះទង្គិចធ្ងន់ធ្ងរនៅក្នុងមន្ទីរពេទ្យកុមារអង្គរ៕ អត្ថបទ៖ ឈិត បូរ៉ាវី