បាល់ទាត់៖ អ្នកចាត់ការក្រុមជំរើសជាតិអង់គ្លេសលោក Gareth Southgate បានរំពឹងថា កូនក្រុមរបស់លោកនឹងអាចបង្កើតប្រវត្តិសាស្ត្រ នាំអង់គ្លេសឈ្នះពានជើងឯកអឺរ៉ុបលើកដំបូង។ បើអាចយកឈ្នះដាណឺម៉ាកយប់នេះបាន អង់គ្លេសនឹងឈានឡើងវគ្គផ្ដាច់ព្រ័ត្រពានរង្វាន់ធំលើកដំបូងតាំងពីឆ្នាំ១៩៦៦ ដែលពួកគេឈ្នះជើងឯកពិភពលោកលើទឹកដីរបស់ខ្លួន។
ជំនួបទល់នឹងដាណឺម៉ាកយប់នេះនៅកីឡដ្ឋាន Wembley ដែលនឹងបើកឱ្យទស្សនិកជនចូលទស្សនាផ្ទាល់ដល់ទៅ ៦ម៉ឺននាក់ ជាពិសេសអ្នកគាំទ្រម្ចាស់ផ្ទះអង់គ្លេសនោះ លោក Gareth Southgate រំពឹងថា អ្នកគាំទ្រគឺជាកត្តាចម្បងមួយដែលអាចនាំអង់គ្លេសសំរេចគោលដៅ។ រយៈពេល ៥៥ឆ្នាំមកហើយដែលអង់គ្លេសទន្ទឹងរង់ចាំ ការប្រកួតវគ្គផ្តាច់ព្រ័ត្រពានរង្វាន់ធំៗមិនថា World Cup រឺជើងឯកទ្វីបអឺរ៉ុបនេះ។ ស្ថិតិល្អបំផុតរបស់អង់គ្លេសគឺត្រឹមវគ្គពាក់កណ្តាលផ្តាច់ព្រ័ត្រនេះឯង ពោលគឺនៅជើងឯកអឺរ៉ុបពួកគេឡើងវគ្គ ៤ក្រុមចុងក្រោយនេះបាន ៣លើករាប់ទាំងលើកនេះ និង World Cup បាន ៣លើកនៅឆ្នាំ១៩៦៦ ជាជើងឯក និង ២លើកទៀតនៅឆ្នាំ១៩៩០ និង ២០១៨ ថ្មីៗនេះនៅរុស្ស៊ី។
ចំណែកដាណឺម៉ាកធ្លាប់មានប្រវត្តិឈ្នះជើងឯកអឺរ៉ុប ១លើកនៅឆ្នាំ១៩៩២ នៅពេលយកឈ្នះអាល្លឺម៉ង់ ២-០ នៅវគ្គផ្តាច់ព្រ័ត្រដែលរៀបចំនៅទឹកដីស៊ុយអែត ក្រៅពីនោះដាណឺម៉ាកក៏ធ្លាប់ឡើងដល់វគ្គពាក់កណ្តាលផ្តាច់ព្រ័ត្រនេះ ២លើកផងដែរនៅឆ្នាំ១៩៦៤ និង ១៩៨៤។ ក្រុមទាំងពីរមានប្រវត្តិជួបគ្នា ២១លើករាប់តាំងពីឆ្នាំ១៩៤៨ អង់គ្លេសឈ្នះ១២ ស្មើ៥ និងដាណឺម៉ាកឈ្នះ៤។ ជំនួបចុងក្រោយបំផុតនៅឆ្នាំ២០២០ ពាន UEFA Nations League ដាណឺម៉ាកឈ្នះ ១-០ នៅថ្ងៃទី១៤ ខែតុលា៕
អត្ថបទ៖នាង សុភាវុធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
