អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) បញ្ជាក់ថា គ.ជ.ប នឹង​មាន​វិធានការ​ច្បាប់​ប្រសិនមានពាក្យបណ្តឹងពាក់ព័ន្ធនឹងការគំរាមកំហែងដល់អង្គបោះឆ្នោត។

ឯកឧត្តម ហង្ស ពុទ្ធា សមាជិក និងជាអ្នកនាំពាក្យ គ.ជ.ប បានប្រាប់ BTVនៅថ្ងៃទី២២ ខែកុម្ភៈ ឆ្នាំ​២០២៤ថា ក្នុងពេលគណបក្សនយោបាយទាំង៤ ដែលចូល​រួម​ប្រកួត​ប្រជែង​ក្នុង​ការ​បោះឆ្នោត​ជ្រើស​តាំង​សមាជិកព្រឹទ្ធសភា នីតិកាលទី៥នេះ គ.ជ.ប កំពុងបន្តតាមដាន​យ៉ាង​យក​ចិត្ត​ទុក​ដាក់​លើ​សកម្មភាពយុទ្ធនាការឃោសនាបោះឆ្នោត ដែលកំពុងប្រព្រឹត្តទៅតាមបណ្តារាជធានី-ខេត្ត រួម​ទាំងស្ថានភាពទូទៅក្នុងមូលដ្ឋានរៀបចំការបោះឆ្នោតនីមួយៗ។

ឆ្លើយ​តប​ទៅនឹងសំណួរអំពីការទទួលពាក្យបណ្តឹងទៅលើការគំរាមកំហែងអង្គបោះឆ្នោត ឯកឧត្តម បញ្ជាក់ថា មកទល់ពេលនេះ គ.ជ.ប ពុំទាន់ទទួលបានពាក្យបណ្តឹងណាមួយពីបុគ្គល ឬ​គណបក្ស​នយោបាយ​ណា​មួយនៅឡើយ។ ឯកឧត្តម បន្តថា ទោះជាយ៉ាងណា គ.ជ.ប ស្វាគមន៍ និង​រង់ចាំ​ទទួល​ពាក្យ​បណ្តឹង ដើម្បីដោះស្រាយ ក៏ដូចជាមានចំណាត់ការតាមផ្លូវច្បាប់ផ្អែកលើបទបញ្ជា និង​នីតិវិធី។

ជាមួយគ្នា អ្នកនាំពាក្យ គ.ជ.ប បានអំពាវនាវដល់បណ្តាគណបក្សនយោបាយ និង​សកម្មជន​ទាំង​អស់​បង្កើន​ភាពអត់ធ្មត់ និងអនុវត្តឱ្យបានត្រឹមត្រូវតាមច្បាប់ស្តីគណបក្សនយោបាយ និងច្បាប់​ស្តីពី​កា​របោះឆ្នោតជ្រើសតាំងសមាជិកព្រឹទ្ធសភា ដែលជាគំរូ​ល្អ​សម្រាប់​ការ​បោះឆ្នោត​ផ្សេង​ទៀត​នា​ពេលខាងមុខ។

ទន្ទឹមគ្នានេះ អ្នកនាំពាក្យ គ.ជ.ប បានណែនាំឱ្យគណបក្សនយោបាយចំនួនបួន ដែល​ត្រូវ​បាន​ទទួល​ស្គាល់​ជាផ្លូវការ បន្តរក្សាសិទ្ធិធ្វើការឃោសនារកសំឡេងឆ្នោតរបស់ខ្លួន ដោយគោរព​ទៅ​តាម​ច្បាប់ បទបញ្ជា និងនីតិវិធីនៃការបោះឆ្នោត ក៏ដូចជាសេចក្តី​ណែនាំ​ស្តីពី​ការ​ឃោស​នា​បោះ​ឆ្នោត ក្នុងស្មារតីទទួលខុសត្រូវ និងត្រូវមានការយោគយល់អធ្យាស្រ័យគ្នាទៅវិញទៅមក ខណៈ​យុទ្ធ​នាការឃោសនាបោះឆ្នោតនឹងបញ្ចប់នៅថ្ងៃទី២៣ ខែកុម្ភៈ ឆ្នាំ២០២៤។

សូម​ជម្រាបថា ការបោះឆ្នោតជ្រើសតាំងសមាជិកព្រឹទ្ធសភាខាងមុខ នឹងប្រព្រឹត្តទៅនាថ្ងៃទី២៥ ខែ​កុម្ភៈ ឆ្នាំ២០២៤ ដោយមានការិយាល័យសរុបចំនួន៣៣ការិយាល័យ និង​អង្គ​បោះឆ្នោត​សរុប​ចំនួន ១១,៧៤៧នាក់ ក្នុងនោះអ្នកតំណាងរាស្ត្រក្នុងតំណែងមានចំនួន ១២៥ នាក់ និង​ក្រុម​ប្រឹក្សា​ឃុំ-សង្កាត់នៅទូទាំងប្រទេសចំនួន ១១,៦២២នាក់។ ក្នុងនោះ ចំពោះ​គណ​បក្ស​នយោបា​យ​ចំនួន៤ដែលចូលរួមប្រកួតប្រជែងការបោះឆ្នោតខាងមុខនេះ រួមមាន គណបក្សប្រជាជនកម្ពុជា គណបក្ស​ហ្វ៊ុនស៊ិនប៉ិច គណបក្សកម្លាំងជាតិ និងគណបក្សឆន្ទៈខ្មែរ៕ អត្ថបទ៖ សេក ឧត្តម