ទាហានអ៊ុយក្រែន ដែលកំពុងជីកកន្លែងលាក់ខ្លួនជុំវិញទីតាំងថ្មីនៅខាងក្រៅទីក្រុង អាវឌីអ៊ីវកា (Avdiivka) និយាយថា កងកម្លាំងរុស្ស៊ី ដែលបានដណ្តើមកាន់កាប់ទីក្រុងភាគខាងកើតអ៊ុយក្រែនកាលពីសប្តាហ៍មុន កំពុងបន្តវាយសម្រុកឆ្ពោះទៅកាន់ទីក្រុង និងភូមិផ្សេងៗដែលនៅក្បែរនោះ។

ទាហានអ៊ុយក្រែនម្នាក់បាននិយាយថា «កងកម្លាំងរុស្ស៊ី មិនបញ្ឈប់ដោយត្រឹមតែដណ្ដើមបានទីក្រុង អាវឌីអ៊ីវកាទេ ពួកគេនឹងបន្តការវាយលុកទីតាំងរបស់យើងទៀត។ បន្ទាប់ពីយកបានក្រុង អាវឌីអ៊ីវកា រួចហើយរុស្ស៊ីនឹងបន្តវាយយកភូមិផ្សេងៗនៅក្បែរនោះ»។

កងកម្លាំងរុស្ស៊ី ដណ្ដើមបានក្រុង អាវឌីអ៊ីវកា បន្ទាប់ពីការទម្លាក់គ្រាប់បែកជាច្រើនខែ ដែលបានធ្វើឱ្យទីក្រុងនេះខ្ទេចខ្ទី។ នេះគឺជាជ័យជម្នះក្នុងសមរភូមិដ៏ធំបំផុតរបស់រុស្ស៊ី ចាប់តាំងពីកងកម្លាំងរបស់ខ្លួនដណ្តើមបានក្រុង បាកមុត (Bakhmut) ក្នុងខែឧសភា ឆ្នាំ២០២៣ មក។

ការយកបានក្រុង អាវឌីអ៊ីវកា បន្ទាប់ពីមានការវិវត្តន៍តិចតួចនៅក្នុងសមរភូមិជួរមុខជាច្រើនខែ បានបង្ហាញពីការផ្លាស់ប្តូរនៃសន្ទុះប្រយុទ្ធនៅពេលដែលខួបលើកទី២ នៃការឈ្លានពានរបស់រុស្ស៊ី ជិតមកដល់ ខណៈលោកប្រធានាធិបតី វ្ល៉ាឌីមៀ ពូទីន បាននិយាយថា ទាហានរុស្ស៊ី នឹងវាយរុញបន្ថែមទៀតចូលទៅក្នុងទឹកដីអ៊ុយក្រែន៕