ទូរទស្សន៍រដ្ឋ CCTV បានរាយការណ៍ថា មនុស្ស ២នាក់បានស្លាប់ និង ៣នាក់ទៀត បាត់ខ្លួន បន្ទាប់ពីនាវា ១គ្រឿង បានបុកជាមួយស្ពានឆ្លងទន្លេមួយក្នុងតំបន់ដីសណ្ដទន្លេ Pearl របស់ប្រទេសចិន នៅក្បែរទីក្រុង Guangzhou នាថ្ងៃព្រហស្បតិ៍ (ទី២២ ខែកុម្ភៈ) នេះ ដោយហេតុការណ៍នោះបានបណ្តាលឲ្យដាច់ផ្នែកខ្លះរបស់ស្ពាន និងរថយន្តមួយចំនួនធ្លាក់ចូលទៅក្នុងទឹក។

មានយានយន្តចំនួន ៥គ្រឿង ក្នុងនោះមានម៉ូតូ ១គ្រឿងផងដែរ ដែលពាក់ព័ន្ធនឹងហេតុការណ៍គ្រោះថ្នាក់នេះ។ ការស៊ើបអង្កេតបឋមបានរកឃើញថា រថយន្ត ២គ្រឿងបានធ្លាក់ចូលទៅក្នុងទន្លេ ខណៈ ១គ្រឿងទៀតធ្លាក់ចូលទៅក្នុងនាវា។ កិច្ចប្រឹងប្រែងជួយសង្គ្រោះកំពុងដំណើរការ។

ប្រព័ន្ធផ្សព្វផ្សាយចិនបានរាយការណ៍ថា អ្នកមុជទឹក ៦នាក់ ត្រូវបានបញ្ជូន បន្ទាប់ពីមានរថយន្តក្រុង ១គ្រឿង ស្ថិតក្នុងចំណោមរថយន្តដែលធ្លាក់ពីលើស្ពាននោះដែរ។ ប្រតិបត្តិកររថយន្តក្រុង គឺក្រុមហ៊ុនរថយន្តក្រុង Guangzhou បានប្រាប់ថា អ្នកបើកបររថយន្តក្រុងមិនអាចទាក់ទងបានទេ តែបញ្ជាក់ថា មិនមានអ្នកដំណើរនៅលើរថយន្តក្រុងនោះឡើយ។

រដ្ឋបាលសុវត្ថិភាពដែនសមុទ្រ Guangzhou បានឲ្យដឹងនៅក្នុងសេចក្តីថ្លែងការណ៍មួយនៅលើគណនីបណ្ដាញសង្គម WeChat របស់ខ្លួនថា នាវានេះកំពុងធ្វើដំណើរពីទីក្រុង Foshan ទៅកាន់តំបន់ភាគខាងត្បូងនៃទីក្រុង Guangzhou នៅពេលដែលនាវានោះបានបុកស្ពាននៅម៉ោង ៥:៣០នាទីព្រឹក ម៉ោងក្នុងស្រុក។

រដ្ឋបាលដែនសមុទ្រ Guangzhou បានឲ្យដឹងនៅក្នុងសេចក្ដីថ្លែងការណ៍ថា អាជ្ញាធរកំពុងស៊ើបអង្កេតមូលហេតុនៃឧបទ្ទវហេតុនេះ ហើយព័ត៌មានអំពីអ្នកស្លាប់ និងរបួស កំពុងត្រូវបានផ្ទៀងផ្ទាត់៕