ទូរទស្សន៍ al-Masirah ដំណើរការដោយក្រុមហ៊ូទី បានរាយការណ៍ថា យន្តហោះចម្បាំងរបស់សហរដ្ឋអាមេរិក បានធ្វើការវាយប្រហារតាមអាកាសចំនួន៥លើក ដោយដាក់គោលដៅទៅលើទីក្រុងកំពង់ផែសមុទ្រក្រហម Hodeidah របស់ប្រទេសយេម៉ែនកាលពីថ្ងៃពុធ។

ការវាយប្រហារ បានធ្លាក់ទៅលើតំបន់ Ras Issa ក្នុងស្រុក al-Salif ភាគពាយព្យទីក្រុង ប៉ុន្តែគ្មានអ្នកស្លាប់ឬរងរបួសនោះទេ។ ប្រជាជននៅទីក្រុង Hodeidah បាននិយាយថា មានការផ្ទុះធំៗជាច្រើន នៅមូលដ្ឋានសមុទ្ររបស់យោធាគ្រប់គ្រងដោយក្រុមហ៊ូទី នៅតំបន់ Ras Issa។

ក្រុមហ៊ូទី បានបើកការវាយប្រហារដោយមីស៊ីល ប្រឆាំងនាវា ទៅលើនាវាដឹកជញ្ជូនអន្តរជាតិ ដែលធ្វើដំណើរឆ្លងកាត់សមុទ្រក្រហម ចាប់តាំងពីពាក់កណ្តាលខែវិច្ឆិកាកន្លងទៅនេះ ជាអ្វីដែលពួកគេនិយាយថាក្នុងសាមគ្គីភាពជាមួយពលរដ្ឋប៉ាឡេស្ទីន នៅតំបន់ហ្កាហ្សា។

នាវាជាច្រើនគ្រឿងត្រូវបានបំផ្លាញ ដោយបានបង្ខំឲ្យក្រុមហ៊ុនដឹកជញ្ជូនធំៗជាច្រើន ផ្លាស់ប្តូរផ្លូវ នៅជុំវិញទ្វីបអាហ្វ្រិក ដោយបានបង្កើនថ្លៃដឹកជញ្ចូនទំនិញ។

យោធាសហរដ្ឋអាមេរិក ដែលវាយលុកក្រុមហ៊ូទីស្ទើរតែរាល់ថ្ងៃ ចាប់តាំងពី ខែមករា មក នៅពុំបានអធិប្បាយលើការវាយប្រហារនាពេលថ្មីៗនេះតាមដែលបានចោទប្រកាន់នោះទេ។

ក្រុមហ៊ូទីប្រដាប់អាវុធ បានគ្រប់គ្រងទីក្រុងយុទ្ធសាស្ត្រ Hodeidah ចាប់តាំងពីកិច្ចព្រមព្រៀងទីក្រុង Stockholm ជ្រោមជ្រែងដោយអង្គការសហប្រជាជាជាតិ ឆ្នាំ២០១៨ ត្រូវបានគាំទ្រដោយសហរដ្ឋអាមេរិក និងចក្រភពអង់គ្លេស បានបង្ខំឲ្យរដ្ឋាភិបាលទទួលស្គាល់ជាអន្តរជាតិ ចាកចេញ។