មន្ទីរបញ្ចកោណ កាលពីថ្ងៃពុធ (ទី២១ ខែកុម្ភៈ) បាននិយាយថា ក្រសួងការបរទេសសហរដ្ឋអាមេរិកបានអនុម័តការលក់ដ៏មានសក្ដានុពលមួយទៅឲ្យកោះតៃវ៉ាន់ ដែលមានទំហំទឹកប្រាក់ប្រហែល ៧៥លានដុល្លារ ជុំវិញផែនការធ្វើឲ្យប្រសើរឡើងនូវប្រព័ន្ធតភ្ជាប់ទិន្នន័យយុទ្ធសាស្ត្រកម្រិតខ្ពស់របស់កោះនេះ។

ការលក់នេះកើតឡើងចំពេលមានភាពតានតឹងកាន់តែខ្លាំងរវាងតៃវ៉ាន់ និងប្រទេសចិន ដែលអះអាងកោះនេះជាទឹកដីរបស់ខ្លួន ហើយចិនមិនដែលបដិសេធចោលក្នុងការប្រើប្រាស់កម្លាំងដើម្បីគ្រប់គ្រងកោះតៃវ៉ាន់នោះទេ។

មន្ទីរបញ្ចកោណបានប្រាប់ថា កញ្ចប់នៃការលក់នេះនឹងរួមបញ្ចូលប្រព័ន្ធសន្តិសុខ Cross Domain Solutions ឧបករណ៍ធានាកម្រិតខ្ពស់ (High Assurance) ប្រព័ន្ធកំណត់ទីតាំងសកល ឧបករណ៍ទំនាក់ទំនង សេវាកម្មបច្ចេកទេស និងធាតុផ្សំពាក់ព័ន្ធផ្សេងទៀតនៃការដឹកជញ្ជូន និងការគាំទ្រកម្មវិធីនានា។

ទីភ្នាក់ងារសហប្រតិបត្តិការសន្តិសុខការពារជាតិរបស់មន្ទីរបញ្ចកោណ បានជូនដំណឹងនេះទៅសភាអំពីការលក់ដែលអាចកើតមាន កាលពីថ្ងៃពុធ។ តែទោះបីជាមានការយល់ព្រមពីក្រសួងការបរទេសក៏ដោយ ក៏ការជូនដំណឹងនេះមិនបង្ហាញថា កិច្ចសន្យាត្រូវបានចុះហត្ថលេខា ឬថា ការចរចាត្រូវបានបញ្ចប់សព្វគ្រប់នោះទេ៕