នៅក្នុងបទសម្ភាសន៍មួយជាមួយវិទ្យុ Radio Liberty អគ្គលេខាធិការអង្គការណាតូ លោក ចេន ស្តូលថិនប៊ឺក (Jens Stoltenberg) បាននិយាយថា នៅពេលដែលអ៊ុយក្រែនទទួលបានយន្តហោះចម្បាំង F-16s ពីសម្ព័ន្ធមិត្ត ខ្លួននឹងមានសិទ្ធិការពារខ្លួន រួមទាំងសមត្ថភាពក្នុងការវាយប្រហារគោលដៅយោធាស្របច្បាប់របស់រុស្ស៊ី ហួសទឹកដីអ៊ុយក្រែនទៅទៀត។

នៅពេលសួរថាតើនៅពេលណាដែលអ៊ុយក្រែន នឹងអាចដាក់ពង្រាយយន្តហោះចម្បាំង F-16 លោក ស្តូលថិនប៊ឺក បានឆ្លើយថា វាមិនអាចទៅរួចទេក្នុងការបញ្ជាក់ជាក់លាក់ទេ។ លោកបានរំលឹកឡើងវិញថា សម្ព័ន្ធមិត្តទាំងអស់របស់អ៊ុយក្រែន ចង់បានយន្តហោះចម្បាំងនៅទីនោះ ឲ្យបានឆាប់តាមដែលអាចធ្វើទៅបាន ប៉ុន្តែលោកបានលើកឡើងថា ឥទ្ធិពលនៃការប្រើប្រាស់យន្តហោះ F-16s នឹងកាន់តែខ្លាំង ប្រសិនបើអាកាសយានិក មានការហ្វឹកហ្វឺនយ៉ាងល្អ ហើយក្រុមថែទាំ និងបុគ្គលិកជំនួយផ្សេងទៀត ត្រូវបានរៀបចំយ៉ាងល្អនោះ ។

ដូច្នេះ ខ្ញុំគិតថា យើងត្រូវស្តាប់អ្នកជំនាញខាងយោធាឲ្យបានច្បាស់ថា តើពេលណាដែលយើងនឹងត្រៀមខ្លួន ឬពេលណាដែលសម្ព័ន្ធមិត្ត នឹងត្រៀមខ្លួន ដើម្បីចាប់ផ្តើមបញ្ជូន និងបញ្ជូនយន្តហោះ F-16s  ហើយបើបញ្ចូនមកកាន់តែឆាប់ គឺកាន់តែល្អ។

លោកបានបញ្ជាក់ថា សម្ព័ន្ធមិត្តនីមួយៗ នឹងសម្រេចចិត្តថាតើត្រូវផ្គត់ផ្គង់យន្តហោះ F-16 ដល់អ៊ុយក្រែន ហើយសម្ព័ន្ធមិត្តមានគោលនយោបាយខុសៗគ្នា។ ទោះបីជាយ៉ាងណាក៏ដោយ ក្នុងពេលជាមួយគ្នានេះ លោកបានកត់សម្គាល់ថា សង្រ្គាមនៅអ៊ុយក្រែន មានភាពខ្លាំងក្លា ហើយអ៊ុយក្រែន មានសិទ្ធិការពារខ្លួន រួមទាំងសមត្ថភាពក្នុងការវាយប្រហារគោលដៅយោធារុស្ស៊ីស្របច្បាប់ លើសពីទឹកដីអ៊ុយក្រែន។