ភ្នំពេញ ៖ ដោយសារ​អ្នកជំងឺគ្រុនឈាមមានការកើនឡើងគួរឱ្យព្រួយបារម្ភ រដ្ឋបាលរាជធានីភ្នំពេញបានបើកកិច្ចប្រជុំជាមួយនឹងមន្ទីរសុខាភិបាល មន្ទីរជំនាញពាក់ព័ន្ធ និងអភិបាលខណ្ឌទាំង១៤ ដើម្បីរិះរកវិធានការធ្វើយ៉ាងណាកាត់បន្ថយឱ្យបាននូវការរីករាលដាលនៃជំងឺគ្រុនឈាមនេះ ។

​ថ្លែងក្នុងកិច្ចប្រជុំរៀបចំផែនការបាញ់ថ្នាំសម្លាប់សត្វមូសនៅតាមមូលដ្ឋានសង្កាត់ នា រសៀល ថ្ងៃ ទី ២២ ខែកុម្ភៈ ឆ្នាំ ២០២៤ នៅសាលារាជធានី ភ្នំពេញ ឯកឧត្ដម ឃួង ស្រេង អភិបាល រាជធានីភ្នំពេញ បានថ្លែងថា អនុវត្តតាមអនុសាសន៍ណែនាំដ៏ខ្ពង់ខ្ពស់របស់សម្ដេចមហាបវរអធិបតីហ៊ុន ម៉ាណែត នាយករដ្ឋមន្ត្រី មន្ត្រីរាជការទាំងអស់ ត្រូវឈឺឆ្អាលពីសុខទុក្ខរបស់ប្រជាពលរដ្ឋ ហើយតាមរយៈការងារកន្លងមក គឺពិតជាបានបង្ហាញឱ្យឃើញពីការយកចិត្តទុកដាក់ខ្ពស់ចំពោះសុខទុក្ខរបស់បងប្អូនប្រជាពលរដ្ឋ។

ឯកឧត្ដម ឃួង ស្រេង បន្តថា តាមរយៈរបាយការណ៍ដែលបានបង្ហាញជំងឺគ្រុនឈាមបានកើនគួរឱ្យព្រួយបារម្មណ៍ ដែលទាមទារឱ្យគ្រប់គ្នាមានវិធានការដោះស្រាយពិសេសគឺអនុវត្តវិធានការបាញ់ថ្នាំមូសនៅតាមមូលដ្ឋានរបស់ប្រជាពលរដ្ឋ និងការប្រើប្រាស់ថ្នាំអាប៊ែតសម្លាប់ដង្កូវទឹកជាដើម។

ឯកឧត្ដម ឃួង ស្រេង បានជំរុញអាជ្ញាធរខណ្ឌទាំង១៤ត្រូវចុះពិនិត្យមើលមូលដ្ឋានរបស់ខ្លួនពិសេសចំពោះទីតាំងដែលបង្កលក្ខណៈឱ្យមូសអាចរស់នៅបាន ដើម្បីមានវិធានការកម្ចាត់មូសទាំងនោះចោល។ មន្ទីរសុខាភិបាល ត្រូវតែដើរតួយ៉ាងសំខាន់ក្នុងការធ្វើយ៉ាងណាឱ្យប្រជាពលរដ្ឋមានភាពកក់ក្តៅលើវិស័យសុខាភិបាល ពោលគឺធ្វើយ៉ាងណាកុំឱ្យជំងឺគ្រុនឈាមនេះកើនឡើងថែមទៀត។

លោក ងី មានហេង ប្រធានមន្ទីរសុខាភិបាលរាជធានីភ្នំពេញបានបញ្ជាក់ឱ្យដឹងថា នៅ៦សប្តាហ៍កន្លងមកនេះ ជំងឺគ្រុនឈាមបានឆ្លងរាលដាលចំនួន ១០០០នាក់នៅក្នុងមូលដ្ឋានរាជធានីភ្នំពេញ។

ជុំវិញបញ្ហានេះ ក្រោយពីមានការណែនាំពីឯកឧត្ដម ឃួង ស្រេង អភិបាលរាជធានីភ្នំពេញ មន្ទីរសុខាភិបាលបានបែងចែកក្រុមការងារជា៤ក្រុមដើម្បីបាញ់ថ្នាំសម្លាប់សត្វមូស ដោយដំបូងនេះនឹងបាញ់ថ្នាំសម្លាប់មូលនៅខណ្ឌចំនួន៤ មានខណ្ឌមានជ័យ ខណ្ឌពោធិ៍សែនជ័យ ខណ្ឌដង្កោនិងខណ្ឌកំបូល ដោយចាប់អនុវត្តកិច្ចការងារនេះ ចាប់ពីថ្ងៃស្អែកនេះទៅ៕ អត្ថបទ ៖ ប្រាក់ វ៉ាន់ដា