ប្រទេសចិន នៅថ្ងៃព្រហស្បតិ៍ (ទី២២ ខែកុម្ភៈ) នេះ បានស្នើឲ្យតុលាការយុត្តិធម៌អន្តរជាតិ (ICJ) ចេញសេចក្ដីសម្រេចផ្តល់យោបល់របស់ខ្លួន ស្ដីពីការកាន់កាប់ដែនដីប៉ាឡេស្ទីនរបស់អ៊ីស្រាអែល ដែលខ្លួនបាននិយាយថា គឺខុសច្បាប់។

ទីប្រឹក្សាច្បាប់របស់ក្រសួងការបរទេសចិន លោក Ma Xinmin បានប្រាប់តុលាការនៅទីក្រុងឡាអេ ប្រទេសហូឡង់ថា៖ «ការផ្ដល់យុត្តិធម៌ត្រូវបានពន្យារពេលជាយូរមកហើយ ប៉ុន្តែវាមិនត្រូវបដិសេធនោះឡើយ»។ លោកបានបន្តថា៖ «៥៧ឆ្នាំបានកន្លងផុតទៅហើយ ចាប់តាំងពីអ៊ីស្រាអែលបានចាប់ផ្តើមការត្រួតត្រារបស់ខ្លួនលើ OPT (ដែនដីកាន់កាប់ប៉ាឡេស្ទីន)។ ទិដ្ឋភាពខុសច្បាប់នៃការត្រួតត្រា និងអធិបតេយ្យភាពលើដែនដីកាន់កាប់ប៉ាឡេស្ទីន នៅតែមិនផ្លាស់ប្ដូរដដែល»។ 

គួរបញ្ជាក់ថា តុលាការកំពូលរបស់អង្គការសហប្រជាជាតិ ដែលត្រូវបានគេស្គាល់ថា ជាតុលាការពិភពលោកនោះ ក្នុងសប្តាហ៍នេះកំពុងបើកសវនាការលើទឡ្ហីករណ៍ពីរដ្ឋមិនតិចជាង ៥០ បន្ទាប់ពីមានសំណើរបស់មហាសន្និបាតអង្គការសហប្រជាជាតិ ក្នុងឆ្នាំ២០២២ ដើម្បីចេញសេចក្ដីសម្រេចផ្ដល់យោបល់ដែលមិនជាប់កាតព្វកិច្ច ស្ដីអំពីផលវិបាកផ្លូវច្បាប់ ជុំវិញការគ្រប់គ្រងរបស់អ៊ីស្រាអែល។

សវនាការនេះគឺជាផ្នែកមួយនៃការជំរុញរបស់ប៉ាឡេស្ទីន ដើម្បីឲ្យស្ថាប័នច្បាប់អន្តរជាតិពិនិត្យមើលការប្រព្រឹត្តរបស់អ៊ីស្រាអែល ដែលការពិនិត្យនោះកាន់តែមានភាពបន្ទាន់ជាចាំបាច់ ចាប់តាំងពីការវាយប្រហារកាលពីថ្ងៃទី៧ ខែតុលា ដោយក្រុមហាម៉ាសទៅលើអ៊ីស្រាអែល ដែលបានសម្លាប់មនុស្ស ១.២០០នាក់ ហើយតាមមកដោយការឆ្លើយតបខាងយោធារបស់អ៊ីស្រាអែល ដែលបានសម្លាប់ប្រជាជនប៉ាឡេស្ទីនប្រហែល ២៩.០០០នាក់៕