ទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈនៅឆ្នាំ២០២៤នេះ បានបន្តរៀបចំវគ្គបណ្តុះបណ្តាលស្តីពី «វិធីសាស្រ្តស្វែងរកការងារ» បន្ថែមទៀត ដើម្បីណែនាំដល់យុវជន សិស្ស និស្សិត និងអ្នកស្វែងរកការងារ ដែលមានបំណងចង់ចូលរៀន ដើម្បីអាចទទួលបានការងារធ្វើកាន់តែឆាប់រហ័ស។
លោក ឆោម សុខឿន ប្រធានមជ្ឈមណ្ឌលការងាររាជធានីភ្នំពេញនៃទីភ្នាក់ងារជាតិមុខរបរ និងការងារ នៅព្រឹកថ្ងៃទី២៣ ខែកុម្ភៈនេះ បានមានប្រសាសន៍ប្រាប់ទូរទស្សន៍ព័ត៌មាន ប៊ីធីវី ឲ្យដឹងថា វគ្គបណ្តុះបណ្តាលនេះនឹងធ្វើឡើងជារៀងរាល់ថ្ងៃអង្គារ និងដោយឥតគិតថ្លៃ ក្នុងគោលបំណងជួយដល់អ្នកស្វែងរកការងារ ជាពិសេសយុវជន ដើម្បីយល់ដឹងបន្ថែមអំពីវិធីសាស្រ្ត និងគន្លឹះចាំបាច់នានាក្នុងការចុលទីផ្សារការងារប្រកបដោយភាពប្រកួតប្រជែង និងមានទំនុកចិត្តចំពោះការជ្រើសរើសមាគ៌ាអាជីពរបស់ខ្លួន ដោយសារទីផ្សារការងារមានការប្រែប្រួល និងវិវត្តជានិច្ចពាក់ព័ន្ធជំនាញ និងគុណវឌ្ឍដែលត្រូវការសម្រាប់បំពេញការងារ។
លោកបានបន្តថា វគ្គបណ្តុះបណ្តាលនេះដែរ នឹងផ្តោតលើមូលដ្ឋានគ្រឹះសំខាន់ៗ ដូចជា៖ វិធីសាស្រ្តស្វែងរកការងារ, វិធីសាស្រ្តស្វែងរកប្រភពការងារ, វិធីសាស្រ្តរៀបចំប្រវត្តិរូប, វិធីសាស្រ្តសរសេរលិខិតអម/លិខិតស្នើសុំការងារ និងវិធីសាស្រ្តសម្ភាសន៍ការងារ មុនពេល កំឡុងពេល និងក្រោយពេលសម្ភាសន៍ការងារប្រកបដោយប្រសិទ្ធភាព ជាមួយតំណាងក្រុមហ៊ុននានា និងគ្រប់វិស័យទាំងអស់។
លោកបានឲ្យដឹងទៀតថា ក្រៅពីវគ្គបណ្តុះបណ្តាលនេះ NEA តែងតែរៀបចំកម្មវិធីវេទិកាការងារ និងកម្មវិធីសម្ភាសន៍ការងារផងដែរ ដើម្បីរួមចំណែកយ៉ាងសំខាន់ដល់ភាគីនិយោជកដែលកំពុងមានតម្រូវការជ្រើសរើសបុគ្គលិក ទាំងពេលបច្ចុប្បន្ន និងអនាគត ឲ្យមានឱកាសបានជួបជាមួយអ្នកកំពុងស្វែងរកការងារដោយផ្ទាល់ ដើម្បីយកទៅបំពេញបេសកម្មក្រុមហ៊ុន សហគ្រាស និងសម្រេចផែនការរបស់ភាគីនិយោជក។ បន្ថែមពីនេះទៀត NEA ក៏បានរៀបចំយុទ្ធនាការចុះផ្សព្វផ្សាយអំពីផែនការអាជីព នៃការជ្រើសរើសជំនាញសិក្សា និងថ្នាក់ឧត្តមសិក្សាដល់សិស្សានុសិស្ស និស្សិតតាមសាលារៀន និងសាកលវិទ្យាល័យ ដើម្បីបង្ហាញអំពីរបៀបស្វែងរកការងារ និងការប្រឹក្សាយោបល់អំពីការរៀបចំផែនការអាជីពជាដើម។
សូមបញ្ជាក់ជូនទៀតថា វេទិកាការងារនេះ គឺរៀបចំឡើងដោយទីភ្នាក់ងារជាតិមុខរបរ និងការងារ ជាមួយ ស.ស.យ.ក. វិស័យការងារ និងបណ្តុះបណ្តាលវិជ្ជាជីវៈ ដែលជាផ្នែកមួយនៃយន្តការរបស់រដ្ឋាភិបាលក្នុងការផ្ដល់ឱកាសដល់សាធារណៈជនទូទៅ ជាពិសេសយុវជនដែលចង់ស្វែងការងារធ្វើ អ្នកស្វែងរកកន្លែងកម្មសិក្សា ឬអ្នកចង់ផ្លាស់ប្តូរការងារ អាចទទួលបានកាន់តែងាយស្រួល ដោយចំណេញពេលវេលា និងនៅមួយកន្លែង៕ អត្ថបទ៖ ឈិត បូរ៉ាវី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
