ក្រសួងអប់រំ យុវជន និងកីឡា បានចាប់ផ្ដើមចុះសិក្សាស្វែងយល់ពីបេក្ខភាពសាលារៀន ដែលមានអាទិភាពកែប្រែទៅជាសាលារៀនជំនាន់ថ្មី។ ខណៈបច្ចុប្បន្នបេក្ខភាពសាលារៀនដែលអាចប្រែទៅជាសាលារៀនជំនាន់ថ្មីមានចំនួន ៨ ក្នុងនោះសាលារៀនជំនាន់ថ្មីកំពុងដំណើរការមានចំនួន១៣សាលា។ នេះបើតាមការលើកឡើងរបស់ ឯកឧត្តម អ៊ុម រម្យណី រដ្ឋលេខាធិការក្រសួងអប់រំ យុវជន និងកីឡា។
ឯកឧត្តម អ៊ុម រម្យណី បានដឹកនាំក្រុមការងារជំនាញចុះសិក្សាស្វែងយល់ពីបេក្ខភាពសាលារៀនដែលមានអាទិភាពប្រែខ្លួនទៅជាសាលារៀនជំនាន់ថ្មី។ កិច្ចការនេះក្រុមការងារក្រសួងអប់រំចុះទៅទីតាំងសាលារៀនដោយផ្ទាល់ ដើម្បីពិនិត្យមើលដំណើរការសិក្សា ជួបជាមួយសិស្ស និងសិក្សាបន្ថែមផ្ដល់ដំបូន្មានជូនគណៈគ្រប់គ្រងសាលា។
ជាក់ស្ដែងនៅថ្ងៃទី ២២ ខែកុម្ភៈម្សិលម៉ិញនេះ ឯកឧត្តម អ៊ុម រម្យណី បានដឹកនាំក្រុមការងារចុះទៅសិក្សាស្វែងយល់នៅវិទ្យាល័យសម្ដេចកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ដើមឫស ដែលស្ថិតនៅស្រុកកណ្ដាលស្ទឹង ខេត្តកណ្ដាល។ ក្រោយបញ្ចប់ការសិក្សាស្វែងយល់ពីសាលារួចរាល់ ឯកឧត្តមបានកោតសសើរចំពោះសមិទ្ធផល ដែលសាលាសម្រេចបាន ពិសេសគឺការរៀបចំកាលវិភាគសិក្សា វិន័យ និងលទ្ធផលរបស់សិស្សចំពោះការប្រឡងសញ្ញាបត្រមធ្យមសិក្សាទុតិយភូមិ ក្នុងរយៈពេលប៉ុន្មានឆ្នាំមកនេះ។
ឯកឧត្តមមើលឃើញថា វិទ្យាល័យសម្ដេចកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ដើមឫស មានលក្ខណៈសម្បត្តិស្ទើរតែគ្រប់គ្រាន់ជាសាលារៀនជំនាន់ថ្មី។ យ៉ាងណាម៉ិញក្រសួងរង់ចាំការទទួលយករបស់សាលា និងត្រូវសិក្សាលម្អិតបន្ថែមទៀត។ ឯកឧត្តមបញ្ជាក់ថា ការក្លាយខ្លួនទៅជាសាលារៀនជំនាន់ថ្មី គឺផ្ដល់ជាផលប្រយោជន៍ជាធំដល់សាលា។
គួរបញ្ជាក់ថា វិទ្យាល័យសម្ដេចកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ដើមឫស ជាវិទ្យាល័យទើបបង្កើតថ្មី ដែលទើបមានសិស្សចូលរួមប្រឡងបាក់ឌុបកាលពីឆ្នាំ២០១៧។ សាលារៀននេះបច្ចុប្បន្នតម្រូវឱ្យសិស្សរៀនទាំងពីរវេន និងមិនអនុញ្ញាតឱ្យបង្រៀនគួរជាដាច់ខាត។ ជាសមិទ្ធផលធំរបស់សាលា គឺលទ្ធផលប្រឡងបាក់ឌុបនៅឆ្នាំ ២០១៧ រហូតដល់ឆ្នាំ ២០២៣ គឺមានសិស្សប្រឡងធ្លាក់ចំនួន ២នាក់ប៉ុណ្ណោះ។ នេះជាការលើកឡើងរបស់លោក សឿង រដ្ឋា ជានាយកសាលា។
ក្នុងនាមជាគណៈគ្រប់គ្រងសាលា សឿង រដ្ឋា បង្ហាញក្ដីសប្បាយរីករាយដែលមន្ត្រីជំនាញក្រសួងអប់រំ ចុះសិក្សាស្វែងយល់សាលារបស់លោកជាបេក្ខភាពមួយដើម្បីប្រែក្លាយជាសាលារៀនជំនាន់ថ្មី។ ជុំវិញការងារនេះលោកនឹងពិក្សាលម្អិតជាមួយគ្រូបង្រៀន ក៏ដូចជាសហគមន៍ ដើម្បីមានការឯកភាពរួមគ្នា។
សូមជម្រាបថា សាលារៀនជំនាន់ថ្មី គឺជាកំណែទម្រង់ជោគជ័យមួយរបស់ក្រសួងអប់រំ យុវជន និងកីឡា។ សាលារៀនជំនាន់ថ្មី ផ្តោតសំខាន់លើ STEM គឺវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា។ សាលារៀនជំនាន់ថ្មី ត្រូវមានស្វ័យភាព ស្តង់ដាវិជ្ជាជីវៈខ្ពស់ គណនេយ្យភាព នវានុវត្តន៍ និងការបែងចែកធនធាន៕ អត្ថបទ៖ គឹមហុក
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
