ទីភ្នាក់ងារព័ត៌មានហិរញ្ញវត្ថុ អ៊ីខៃ (Yicai) បានរាយការណ៍ថា ទារកកាន់តែច្រើនកំពុងត្រូវបានសម្រាលនៅក្នុងមន្ទីរពេទ្យនៅទូទាំងប្រទេសចិនក្នុងឆ្នាំរោងនេះ ដោយជាកំណើនដែលអាចកាត់បន្ថយការធ្លាក់ចុះនៃចំនួនប្រជាជននៅឆ្នាំ២០២៤ និងនាំមកនូវការលើកទឹកចិត្តដល់ក្រុមអ្នកបង្កើតគោលនយោបាយ។

សារព័ត៌មាន អ៊ីខៃ បាននិយាយថា ពង្សរាសីចក្រសត្វនាគចិន ត្រូវបានគេជឿថាមានភាពរុងរឿងជាពិសេស ហើយទិន្នន័យពីមន្ទីរពេទ្យនានាក្នុងឱកាសបុណ្យចូលឆ្នាំថ្មី ដែលបានចាប់ផ្តើមកាលពីថ្ងៃទី១០ ខែកុម្ភៈ បានបង្ហាញថា ចំនួនទារកទើបនឹងកើតបានកើនឡើង «គួរឱ្យកត់សម្គាល់»។

សារព័ត៌មាននេះបានសំអាងដល់មន្ទីរពេទ្យមួយនៅទីក្រុង អ៊ូស៊ី (Wuxi) ភាគខាងកើតប្រទេសចិន ដោយរាយការណ៍ពីការកើនឡើង ២០% នៃចំនួនទារកទើបនឹងកើត បើធៀបនឹងឆ្នាំមុន ខណៈដែលមន្ទីរពេទ្យនៅខេត្ត សាន់ស៊ី (Shaanxi) ភាគពាយ័ព្យបានរាយការណ៍ថាមានការកើនឡើង ៧២% នៃទារកទើបកើតបើធៀបនឹងឆ្នាំ២០២៣។

ក្រុមអ្នកប្រជាសាស្រ្តនិយាយថា កំណើនទារក «ឆ្នាំរោង» នេះទំនងជានឹងមានអាយុកាលខ្លីប៉ុណ្ណោះ ដោយសារស្ត្រីកាន់តែច្រើននៅតែជ្រើសរើសមិនយកកូន ព្រោះការចំណាយចិញ្ចឹមកូនខ្ពស់ខ្លាំងពេក ក៏ដូចជាការមិនចង់រៀបការ ឬការត្រូវផ្អាកអាជីពការងាររបស់ពួកគេ នៅក្នុងសង្គមប្រពៃណី ដែលស្ត្រីនៅតែត្រូវបានគេមើលឃើញជាចម្បងថាជាអ្នកមើលថែទាំគ្រួសារ និងការរើសអើងយេនឌ័រនៅតែមាន៕