មន្ត្រីជាន់ខ្ពស់អង្គការសហប្រជាជាតិទទួលបន្ទុកពិនិត្យជំនួយមនុស្សធម៌នៅប្រទេសអ៊ុយក្រែន បានអំពាវនាវឱ្យមានការបន្តគាំទ្រពីសហគមន៍អន្តរជាតិ ខណៈខួប២ឆ្នាំនៃការចាប់ផ្តើមការឈ្លានពានរបស់រុស្ស៊ី ខិតជិតចូលមកដល់។ លោកស្រី Denise Brown អ្នកសម្របសម្រួលពលរដ្ឋរបស់អង្គការសហប្រជាជាតិប្រចាំប្រទេសអ៊ុយក្រែន បាននិយាយដូច្នេះនៅក្នុងបទសម្ភាសន៍ជាមួយប្រព័ន្ធផ្សព្វផ្សាយ NHK នៅរដ្ឋធានី Kyiv កាលពីថ្ងៃពុធ។

លោកស្រី បាននិយាយថា ជម្លោះរវាងអ៊ីស្រាអែល និងក្រុមហាម៉ាស និងវិបត្តិសកលផ្សេងទៀត បានកាត់បន្ថយចំណាប់អារម្មណ៍របស់សហគមន៍អន្តរជាតិ ចំពោះស្ថានភាពនៅប្រទេសអ៊ុយក្រែន។ លោកស្រី Brown បាននិយាយថា សង្រ្គាមនៅអ៊ុយក្រែន «នៅមិនទាន់ចប់នោះទេ»។ លោកស្រី បាននិយាយថា រដ្ឋធានី និងទីក្រុងជាច្រើនទៀត នៅទូទាំងប្រទេសកំពុងទទួលរងការវាយប្រហារតាមអាកាសស្ទើរតែរាល់ថ្ងៃ ហើយសហគមន៍នានា នៅជិតសមរភូមិមុខ តែងតែទទួលរងការបាញ់ប្រហារដោយកាំភ្លើងធំ។

លោកស្រី Brown និយាយបន្តថា មនុស្សជាច្រើនកំពុងរងទុក្ខ មនុស្សជាច្រើននឿយហត់ និងជីវិតជួបការលំបាកខ្លាំង។ ប្រជាជននៅតំបន់ភាគខាងកើតទីក្រុង Donetsk និងតំបន់ផ្សេងទៀត ដែលនៅជិតសមរភូមិមុខ ត្រូវបានបង្ខំឱ្យរស់នៅដោយគ្មានអគ្គិសនីប្រើប្រាស់ បន្ថែមលើការទទួលបានទឹកទទួលទាន និងអាហារតិចតួច។

លោកស្រី និយាយថា ត្រូវការថវិកាចំនួន ៣ ពាន់លានដុល្លារ ដើម្បីផ្តល់ជំនួយមនុស្សធម៌សម្រាប់ប្រជាជនទាំងនេះ។ លោកស្រី Brown បានបញ្ជាក់ថា មានតែ ១០ ភាគរយនៃមូលនិធិចាំបាច់ប៉ុណ្ណោះដែលត្រូវបានផ្តល់ឲ្យរហូតមកដល់ពេលនេះ។