នៅក្នុងបទសម្ភាសន៍មួយដែលត្រូវបានចាក់ផ្សាយកាលពីថ្ងៃព្រហស្បតិ៍ (ទី២២ ខែកុម្ភៈ) នាយករដ្ឋមន្ត្រីអាមេនីលោក Nikol Pashinyan បាននិយាយថា ប្រទេសរបស់លោកបានផ្អាកការចូលរួមរបស់ខ្លួន នៅក្នុងអង្គការសន្ធិសញ្ញាសន្តិសុខសមូហភាព (CSTO) ដែលដឹកនាំដោយរុស្ស៊ី ដោយសារតែកតិកាសញ្ញានេះបានផ្ដល់ភាពបរាជ័យដល់ប្រទេសរបស់លោក។

ជាមួយគ្នានេះ លោក Pashinyan ក៏បានប្រាប់ផងដែរថា អាស៊ែបៃហ្សង់ដែលអាមេនីបានប្រយុទ្ធជាមួយ ក្នុងសង្គ្រាមរយៈពេល ៣ទសវត្សរ៍កន្លងមកនេះ មិនបានប្រកាន់ខ្ជាប់នូវគោលការណ៍ដែលចាំបាច់ ក្នុងការសម្រេចបាននូវសន្ធិសញ្ញាសន្តិភាពរយៈពេលវែងនោះទេ ហើយបានលើកឡើងថា អាស៊ែបៃហ្សង់កំពុងរៀបចំការវាយប្រហារមួយផ្សេងទៀត។ លោក Pashinyan បានប្រាប់ទូរទស្សន៍ France 24 ថា កតិកាសញ្ញា CSTO ដែលដឹកនាំដោយរុស្ស៊ីនេះ បានធ្វើឲ្យអាមេនីបរាជ័យ។

លោក Pashinyan បាននិយាយតាមរយៈអ្នកបកប្រែថា៖ «សន្ធិសញ្ញាសន្តិសុខសមូហភាពនេះ មិនបានបំពេញតាមគោលបំណងរបស់ខ្លួន ដូចដែលអាមេនីមានការព្រួយបារម្ភនោះទេ ជាពិសេសនៅឆ្នាំ២០២១ និងឆ្នាំ២០២២។ ហើយយើងមិនអាចអនុញ្ញាតឲ្យរឿងរ៉ាវកើតឡើងដោយគ្មានការជូនដំណឹងនោះឡើយ។ ឥឡូវនេះ ក្នុងលក្ខខណ្ឌជាក់ស្តែង យើងផ្អាកការចូលរួមរបស់យើងនៅក្នុងសន្ធិសញ្ញានេះ។ ពាក់ព័ន្ធនឹងអ្វីនាពេលខាងមុខ យើងនឹងត្រូវរង់ចាំមើល»។

លោក Pashinyan ក្នុងរយៈពេលប៉ុន្មានខែថ្មីៗនេះ បានសម្តែងការមិនសប្បាយចិត្ត ចំពោះទំនាក់ទំនងដ៏យូរអង្វែងរបស់អាមេនីជាមួយរុស្ស៊ី ហើយបាននិយាយថា អាមេនីមិនអាចពឹងផ្អែកលើរុស្ស៊ីដើម្បីធានាតម្រូវការការពារជាតិរបស់ខ្លួនទៀតទេ។ លោកបានលើកឡើងថា សមាជិកភាពរបស់ខ្លួន នៅ CSTO កំពុងស្ថិតក្រោមការពិនិត្យឡើងវិញ៕