លោកប្រធានាធិបតី វ៉ូឡូមៀ ហ្សេឡិនស្គី ( Volodymyr Zelensky) បានថ្លែងនៅក្នុងបទសម្ភាសន៍ ជាមួយប្រព័ន្ធផ្សព្វផ្សាយរបស់សហរដ្ឋអាមេរិក Fox News ដែលបានចាក់ផ្សាយកាលពីថ្ងៃទី២២ ខែកុម្ភៈថា សង្រ្គាមរបស់រុស្ស៊ីប្រឆាំង នឹងអ៊ុយក្រែនបច្ចុប្បន្ន មិនមែនជាដំណាក់កាលជាប់គាំងទេ។

លោកហ្សេឡិនស្គី បាននិយាយជាមួយអ្នកយកព័ត៌មាន លោក Bret Baier នៅជិតសមរភូមិជួរមុខ ក្នុងតំបន់សាគីវ (Kharkiv) ជាកន្លែងដែលកាំភ្លើងធំ អាចត្រូវបានគេឮនៅក្បែរនោះ។ សារព័ត៌មាន Fox News បានរាយការណ៍ថា នេះគឺជាបទសម្ភាសន៍លើកដំបូងរបស់ប្រធានាធិបតី នៅខ្សែត្រៀមជួរមុខ ចាប់តាំងពីការចាប់ផ្តើមនៃសង្រ្គាមពេញទំហឹងមក។

លោកបាន ប្រាប់លោកBaierថា៖«វាមិនមែនជាការជាប់គាំងទេ ដោយអះអាងថា កងកម្លាំងអ៊ុយក្រែនកំពុងរៀបចំប្រតិបត្តិការថ្មី និងការវាយប្រហារថ្មី»។

លោក បានបញ្ជាក់យ៉ាងជាក់លាក់នូវជោគជ័យរបស់អ៊ុយក្រែនក្នុងការកំណត់គោលដៅលើកងនាវាចរណ៍សមុទ្រខ្មៅរបស់រុស្ស៊ី។ លោកបាននិយាយថា (រុស្ស៊ី) នឹងទទួលបានការភ្ញាក់ផ្អើលមួយចំនួន។

លោកប្រធានាធិបតីហ្សេឡិនស្គី ក៏បាននិយាយដែរថា ការបាត់បង់សមរភូមិរបស់រុស្ស៊ី មានចំនួនច្រើនជាងការបាត់បង់ជីវិតរបស់អ៊ុយក្រែន។

លោកបានបន្តថា៖«សមាមាត្រគឺ១ទល់៥។ «មានន័យថា ទាហានម្នាក់ ត្រូវបានគេសម្លាប់ក្នុងពេលប្រតិបត្តិការ ស្មើនឹងទាហានរុស្ស៊ី៥នាក់ ដែលត្រូវបានគេសម្លាប់ ក្នុងពេលប្រតិបត្តិការ»។