មូលនិធិរូបិយវត្ថុអន្តរជាតិ (IMF) និយាយថា ក្រុមមន្ត្រី បានឈានដល់កិច្ចព្រមព្រៀងជាមួយអាជ្ញាធរអ៊ុយក្រែន ជាផ្នែកនៃដំណើរការដែលនឹងបញ្ចេញមូលនិធិប្រហែល ៨៨០លានដុល្លារ ដើម្បីជួយដល់ប្រទេសនេះ។ មូលនិធិរូបិយវត្ថុអន្តរជាតិ(IMF) បានប្រកាសកាលពីថ្ងៃព្រហស្បតិ៍ថា កិច្ចព្រមព្រៀងត្រូវបានឈានដល់ ក្នុងអំឡុងពេលពិនិត្យឡើងវិញនៃកម្មវិធីប្រាក់កម្ចី រយៈពេលបួនឆ្នាំ។

ស្ថាប័ននេះ បានអនុម័តកម្មវិធី ១៥,៦ ពាន់លានដុល្លារកាលពីខែមីនាឆ្នាំមុន ដើម្បីជួយកសាងហេដ្ឋារចនាសម្ព័ន្ធឡើងវិញ និងជំរុញការស្តារសេដ្ឋកិច្ចរបស់ប្រទេសអ៊ុយក្រែន។ អ៊ុយក្រែន ត្រូវបំពេញតាមលក្ខណៈវិនិច្ឆ័យផ្សេងៗ ដូចជាកំណែទម្រង់រចនាសម្ព័ន្ធ ដែលមានគោលបំណងទប់ស្កាត់អំពើពុករលួយ ដើម្បីទទួលបានការទូទាត់ប្រាក់។ ការសម្រេច ចុងក្រោយនឹងធ្វើឡើងដោយគណៈកម្មការប្រតិបត្តិ របស់ មូលនិធិរូបិយវត្ថុអន្តរជាតិ (IMF) ។

មូលនិធិរូបិយវត្ថុអន្តរជាតិ (IMF) បាននិយាយនៅក្នុងសេចក្តីថ្លែងការណ៍ថា សេដ្ឋកិច្ចរបស់ប្រទេសអ៊ុយក្រែន មានកំណើនខ្លាំង អតិផរណាថយចុះ និងទុនបម្រុងរឹងមាំ កាលពីឆ្នាំ ២០២៣។ ប៉ុន្តែសេចក្តីថ្លែងការណ៍និយាយថា ទស្សនវិស័យសម្រាប់ឆ្នាំ ២០២៤ នៅតែមានភាពមិនប្រាកដប្រជាខ្ពស់ ខណៈសង្រ្គាមនៅតែបន្ត។ 

មូលនិធិរូបិយវត្ថុអន្តរជាតិ (IMF) បាននិងកំពុងផ្តល់ជំនួយហិរញ្ញវត្ថុ ដល់ប្រទេសអ៊ុយក្រែនចាប់តាំងពីការឈ្លានពានរបស់រុស្ស៊ី ចាប់ផ្តើមនៅក្នុងខែកុម្ភៈឆ្នាំ ២០២២។

អ្នកសង្កេតការណ៍ និយាយថាស្ថាប័ននេះ មានបំណងបង្ហាញសញ្ញា បន្តការគាំទ្ររបស់ខ្លួន ខណៈកិច្ចខិតខំប្រឹងប្រែងដើម្បីផ្តល់ជំនួយបន្ថែមដល់អ៊ុយក្រែន ខណៈជំនួយសហរដ្ឋអាមេរិកជាប់គាំង។