អន្ដរជាតិ: នាយករដ្ឋមន្រ្តីស្តីទី លោកក្លូដ ចូសេហ្វ បាននិយាយថា ប្រធានាធិបតីហៃទី លោកចូវេណែល ម័រសេ ត្រូវបានគេធ្វើឃាត​នៅ​ក្នុង​គេហដ្ឋានរបស់លោក។

លោកចូសេហ្វ បាននិយាយថា មនុស្សគ្មានអត្តសញ្ញាណមួយក្រុម បានវាយប្រហារមកលើគេហដ្ឋានផ្ទាល់ខ្លួនរបស់លោកម័រសេ កាលពី​យប់ថ្ងៃពុធ និងបានបាញ់សម្លាប់រូបលោក។

ចំណែក​ឯស្រ្តីទី១ កំពុង​សម្រាក​ព្យាបាល​នៅ​ក្នុង​មន្ទីរ​ពេទ្យ​ ​ក្រោយ​ការ​វាយ​ប្រហារ​នេះ។​ លោក​ ចូសេហ្វ​ បាន​និយាយ​នៅ​ក្នុង​សេចក្តី​ថ្លែង​​​​​​ការណ៍ចេញពីការិយាល័យ របស់លោកថាស្ថានភាពសន្តិសុខហៃទី ស្ថិត​ក្រោម​ការ​គ្រប់​គ្រង​របស់​នគរបាល​ជាតិ​ ​ហើយ​​និង​​កង​​កម្លាំ​ង​​​ប្រដាប់​អាវុធ​ហៃទី​។

លទ្ធិប្រជាធិបតេយ្យ និងសាធារណរដ្ឋ នឹងឈ្នះ។ លោកបន្តថា វិធានការទាំងអស់ នឹងធានាឲ្យបាននិរន្តភាពរដ្ឋ និងការការពារជាតិ។

គួរ​ឲ្យដឹងថា លោកម័រសេ បានគ្រប់គ្រងប្រទេសហៃទី ដែលជាប្រទេសក្រីក្របំផុតនៅអាមេរិកកណ្តាល ដោយក្រឹត្យ បន្ទាប់ពីការ​បោះឆ្នោត​នីតិបញ្ញត្តិកាលពីឆ្នាំ ២០១៨ ត្រូវបានពន្យាពេល និងបន្ទាប់ពីមានជម្លោះ ពេលដែលអាណត្តិរបស់លោកបញ្ចប់។ កាលពីព្រឹកថ្ងៃពុធ ដងផ្លូវនៅក្នុងរដ្ឋធានីព័រ តូ ព្រីន មានសភាពស្ងប់ស្ងាត់។

លោកចូសេហ្វ បាននិយាយថា ក្រុមនគរបាល ត្រូវបានដាក់ពង្រាយទៅកាន់វិមានជាតិ និងតំបន់សហគមន៍ប៉េត្យុងវីល និងកន្លែង​ផ្សេង​ទៀត​​។

លោកបានធ្វើការថ្កោលទោសទាំងស្រុងចំពោះការលួចធ្វើឃាតនេះនិងបានចាត់ទុកថាជាទង្វើអមនុស្សធម៌ដ៏គួរឲ្យស្អប់ខ្ពើមបំផុត និង​ថោក​ទាបបំផុត។ លោកបញ្ជាក់ថា ឃាតករមួយចំនួន និយាយភាសាអេស្ប៉ាញ ប៉ុន្តែលោកមិនបានពន្យល់បន្ថែមនោះទេ។ ការវាយ​ប្រ​ហា​រ​នេះដែរ បានកើតមានខណៈដែលមានរលក នៃអំពើហិង្សាពាក់ព័ន្ធនឹង​បញ្ហានយោបាយ​ក្នុង​ប្រទេស​នៅ​អាមេរិក​កណ្តាល​មួយ​នេះ ហើយនិងការប្រឈមវិបត្តិមនុស្សកើនឡើង និងកង្វះខាតស្បៀងអាហារ៕