យោធាអ៊ីស្រាអែល បាននិយាយនៅថ្ងៃសុក្រនេះថា ខ្លួនបានដាក់គោលដៅវាយប្រហារតាមអាកាសមួយលើពួកសកម្មប្រយុទ្ធមកពីក្រុមអ៊ីស្លាមជីហាត ដែលកំពុងធ្វើសកម្មភាពវាយប្រហារមួយនៅក្នុងតំបន់កាន់កាប់វេស បែង។

ទីភ្នាក់ងារព័ត៌មានប៉ាឡេស្ទីន WAFA បាននិយាយថា ក្មេងម្នាក់អាយុ១៧ឆ្នាំម្នាក់ ត្រូវបានសម្លាប់នៅក្នុងការវាយប្រហារនោះ និងមនុស្សជាច្រើននាក់ទៀត បានរងរបួសក្នុងក្រុងចេនីន(Jenin) កាលពីយប់ថ្ងៃព្រហស្បតិ៍កន្លងទៅនេះ។

កងទ័ពអ៊ីស្រាអែលបានផ្សព្វផ្សាយវីដេអូដោយបាននិយាយពីការវាយប្រហារនៅថ្ងៃព្រហស្បតិ៍ ហើយអ្នកយកពត៌មានReuters អាចបញ្ជាក់ទីតាំងវីដេអូដោយធៀបទៅនឹងអគារដែលនៅជិតៗនិងប្លង់ផ្លូវដែលស៊ីគ្នានឹងរូបភាពផ្កាយរណប។ ចំណែកវីដេអូដែលពាក់ព័ន្ធផ្សេងៗទៀត ក៏ត្រូវគ្នានឹងកន្លែងកើតហេតុដែរ។

យោធាអ៊ីស្រាអែលបាននិយាយថា ការវាយប្រហារនេះបានដាក់គោលដៅលើលោក យ៉ាស៊ើរ ហានុន (Yasser Hanoun) ដែលបានធ្វើសកម្មភាពបាញ់ប្រហារជាច្រើនលើកកាលពីប៉ុន្មានសប្ដាហ៍មុន៕