ជនបរទេស និង «ជនគ្មានរដ្ឋ» នឹងត្រូវបានអនុញ្ញាតឲ្យចូលបម្រើការនៅក្នុងឆ្មាំជាតិរបស់អ៊ុយក្រែន នេះបើយោងតាមក្រឹត្យមួយដែលបានចុះហត្ថលេខាកាលពីថ្ងៃទី ២១ ខែកុម្ភៈ ដោយលោកប្រធានាធិបតី វ៉ូឡូមៀ ហ្សេឡិនស្គី ( Volodymyr Zelensky)។

សេចក្តីប្រកាសដែលត្រូវបានចេញផ្សាយនៅលើគេហទំព័ររបស់ការិយាល័យប្រធានាធិបតី ធ្វើឡើងនៅពេលដែលរដ្ឋាភិបាល ព្យាយាមបង្កើនកិច្ចខិតខំប្រឹងប្រែងក្នុងប្រមូលផ្តុំកម្លាំង នៅឆ្នាំ២០២៤។ ច្បាប់ថ្មីនេះចូលជាធរមាន នៅថ្ងៃទី២១ ខែកុម្ភៈ។

ច្បាប់នោះចែងថា៖«ជនបរទេសដែលនៅលើទឹកដីនៃអ៊ុយក្រែនស្របច្បាប់ មិនធ្លាប់ជាប់ទោសពីមុនមក និងបំពេញតាមតម្រូវការសម្រាប់ការបម្រើយោធា ដូចដែលបានកំណត់ដោយច្បាប់របស់អ៊ុយក្រែនស្តីពីកា តព្វកិច្ចយោធា និងសេវាកម្មយោធា អាចត្រូវបានទទួលយកដោយផ្អែកលើមូលដ្ឋានស្ម័គ្រចិត្ត (ក្រោមកិច្ចសន្យា)សម្រាប់ការបម្រើយោធាក្នុងឆ្មាំជាតិរបស់អ៊ុយក្រែន»។

ពលរដ្ឋបរទេស អាចបម្រើក្នុងកងកម្លាំងប្រដាប់អាវុធរបស់អ៊ុយក្រែនរួចហើយ ប្រសិនបើពួកគេបំពេញតាមតម្រូវការជាក់លាក់។ បន្ទាប់ពីការលុកលុយយ៉ាងពេញទំហឹងរបស់រុស្ស៊ីក្នុងខែកុម្ភៈ ឆ្នាំ២០២២ លោក ហ្សេឡិនស្គី បានអំពាវនាវឲ្យ«ប្រជាពលរដ្ឋនៃពិភពលោក» ចូលរួមក្នុងការការពាររបស់អ៊ុយក្រែន ដោយបង្កើតកងពលអន្តរជាតិ។

ឆ្មាំជាតិ គឺជាផ្នែកមួយរបស់ក្រសួងមហាផ្ទៃ និងទទួលខុសត្រូវលើសន្តិសុខសាធារណៈ។ បុគ្គលិកឆ្មាំជាតិក៏បានប្រយុទ្ធគ្នានៅជួរមុខ ចាប់តាំងពីការផ្ទុះឡើងនៃសង្រ្គាមពេញទំហឹងរបស់រុស្ស៊ី។