អ្នកនាំពាក្យសេវាកម្មសង្រ្គោះបន្ទាន់ក្នុងតំបន់ និយាយនៅថ្ងៃសុក្រនេះថា យានដ្រូនជាច្រើនគ្រឿងរបស់រុស្ស៊ី បានវាយប្រហារប្លុកអគារផ្ទះល្វែងកម្ពស់ច្រើនជាន់ បណ្តាលឲ្យមនុស្ស ៨នាក់រងរបួស នៅទីក្រុងភាគកណ្តាល Dnipro របស់អ៊ុយក្រែន ។ 

 លោក Serhii Kovtoniuk គឺជាអ្នកនាំពាក្យសេវាកម្មសង្រ្គោះបន្ទាន់រដ្ឋអ៊ុយក្រែននៅតំបន់ Dnipropetrovskនិយាយថា ប្រតិបត្តិការជួយសង្រ្គោះ កំពុងបន្ត ហើយពលរដ្ឋផ្សេងទៀត អាចនឹងស្ថិតក្រោមកម្ទេចកម្ទី និងគំនរបាក់បែកអគារ ។ 

 យោធាអ៊ុយក្រែន និយាយថា រុស្ស៊ី បានបញ្ជូនយានដ្រូន ៣១គ្រឿងមកលើទឹកដីអ៊ុយក្រែនទាំងយប់ ក្នុងនោះ ប្រព័ន្ធការពារដែនអាកាស បានបំផ្លាញយានដ្រូន ២៣គ្រឿង នៅក្នុងចំណោមយានដ្រូនទាំងនោះ ។ 

 ដោយឡែក កងទ័ពអាកាសអ៊ុយក្រែន និយាយនៅក្នុងសេចក្តីថ្លែងការណ៍ថា យានដ្រូនរុស្ស៊ី បានវាយប្រហារមកដលើតំបន់ Odesa, Mykolayiv, Poltava, Dnipropetrovsk និងតំបន់ Kharkiv ដោយបានសម្លាប់មនុស្ស ៥នាក់ និងមនុស្ស ២៧នាក់ផ្សេងទៀត រងរបួស ។ 

សូមបញ្ជាក់ថា ថ្ងៃទី២៤ ខែកុម្ភៈ ឆ្នាំ២០២៤នេះ គឺជាឆ្នាំទី២ នៃការលុកលុយរបស់រុស្ស៊ីលើអ៊ុយក្រែន។ នោះគឺជាថ្ងៃដែលកងកម្លាំងយោធារុស្ស៊ី បើកការលុកលុយពេញលេញ ដែលចាប់តាំងពីពេលនោះមកបានធ្វើឱ្យប្រជាជនអ៊ុយក្រែនរាប់ពាន់នាក់ស្លាប់ និងរាប់លាននាក់ត្រូវភៀសខ្លួន ៕