នៅថ្ងៃសុក្រនេះ កសិករឥណ្ឌាដែលនាំគ្នាតវ៉ាទាមទារតម្លៃខ្ពស់ជាងមុនសម្រាប់ផលិតផលកសិកម្មរបស់ពួកគេនោះ បានប្រារព្ធ “ថ្ងៃសោកនាដកម្ម”បន្ទាប់ពីការស្លាប់របស់បាតុករវ័យក្មេងម្នាក់ កាលពីរយៈពេលប៉ុន្មានថ្ងៃមុន ។ 

 កន្សែងរុំក្បាល និងទង់ពណ៌ខ្មៅ ត្រូវបានមើលឃើញនៅជុំវិញទីតាំងធ្វើបាតុកម្ម នៅតំបន់ព្រំដែនរដ្ឋ Punjab និងរដ្ឋ Haryana ។ 

 លោក Sarvan Singh Pandher ដែលជាអគ្គលេខាធិការសហជីបមួយក្នុងចំណោមសហជីពកសិកម្មដឹកនាំបាតុកម្មនេះ បានអំពាវនាវឲ្យប្រជាពលរដ្ឋនៅទូទាំងប្រទេសឥណ្ឌា ធ្វើរឿងតែមួយ ដើម្បីបង្ហាញកំហឹងរបស់ពួកគេចំពោះរដ្ឋាភិបាល ជុំវិញវិធានការបង្រ្កាបរបស់ពួកគេ ។ 

 ក្រុមអាជ្ញាធរ និយាយប្រាប់សារព័ត៌មានក្នុងស្រុកថា បុរសម្នាក់ដែលបានស្លាប់ បានរងរបួសក្បាល ហើយមូលហេតុនៅពុំទាន់បានកំណត់នោះទេ ។ ឧបទ្ទេវហេតុនេះដែរ បានកើតឡើង ក្រោយពេលក្រុមនគរបាល បាញ់ឧស្ម័នបង្ហូរទឹកភ្នែក និងប្រើប្រាស់កាណុងទឹក បំបែកហ្វូងបាតុកររាប់ម៉ឺននាក់ដែលនាំគ្នាដង្ហែក្បួនឆ្ពោះមកកាន់ទីក្រុងដែល្លី កាលពីថ្ងៃពុធ ៕