គេរំពឹងថា សភារបស់ប្រទេសអាល្លឺម៉ង់ នៅថ្ងៃសុក្រ (ទី២៣ ខែកុម្ភៈ) នេះ នឹងអនុម័តច្បាប់ ដែលនឹងអនុញ្ញាតឲ្យមានការដាំដុះ និងការប្រើប្រាស់កញ្ឆា ក្នុងបរិមាណមានកំណត់ ដោយការសម្រេចនេះ នឹងធ្វើឲ្យស្របច្បាប់ដល់ការប្រព្រឹត្តិរបស់ជនជាតិអាល្លឺម៉ង់ចំនួន ៤,៥លាននាក់ដែលត្រូវបានគេប៉ាន់ស្មានថា ប្រើប្រាស់រុក្ខជាតិនេះ។

សេចក្ដីស្នើច្បាប់ដែលលើកឡើងដោយរដ្ឋាភិបាលចម្រុះ ៣គណបក្សដឹកនាំដោយអធិការបតី លោក Olaf Scholz បានកំណត់ថា ការដាំកញ្ឆារហូតដល់ ៣ដើម សម្រាប់ការប្រើប្រាស់ផ្ទាល់ខ្លួន និងការមានកញ្ឆារហូតដល់ ២៥ក្រាម នឹងមិនចាត់ទុកថា ខុសច្បាប់នោះឡើយ។

ហើយផលិតផលកញ្ឆាក្នុងបរិមាណច្រើនជាងនេះ តែមិនមែនសម្រាប់ការលក់ដូរ នឹងត្រូវបានអនុញ្ញាតឲ្យមានសម្រាប់អ្នកនៅក្នុងក្លិបប្រើប្រាស់កញ្ឆាស្របច្បាប់ ដែលអាចមានសមាជិកមិនលើសពី ៥០០នាក់ ដោយអ្នកទាំងអស់នោះនឹងត្រូវតែជាមនុស្សពេញវ័យ។

រដ្ឋមន្ត្រីក្រសួងសុខាភិបាលលោក Karl Lauterbach បាននិយាយថា៖ «ការសម្រេចធ្វើបែបនេះ មានគោលបំណងទប់ស្កាត់ទីផ្សារងងឹត និងឧក្រិដ្ឋកម្មទាក់ទងនឹងគ្រឿងញៀន កាត់បន្ថយចំនួននៃការជួញដូរ និងកាត់បន្ថយចំនួនអ្នកប្រើប្រាស់»។

ការសម្រេចនេះនឹងធ្វើឲ្យអាល្លឺម៉ង់ក្លាយជាប្រទេសទី៩ ក្នុងការផ្ដល់ភាពស្របច្បាប់ សម្រាប់ការប្រើប្រាស់រុក្ខជាតិញៀននេះបែបកម្សាន្ត។ កញ្ឆាក៏ទទួលបានភាពស្របច្បាប់ផងដែរក្នុងយុត្តាធិការ នៅសហរដ្ឋអាមេរិក និងអូស្ត្រាលី៕