សភានីតិបញ្ញត្តិនៃរដ្ឋ Florida សហរដ្ឋអាមេរិក បានអនុម័តសេចក្ដីស្នើច្បាប់បណ្ដាញសង្គមពេញលេញមួយ ដែលនឹងធ្វើឲ្យរដ្ឋនេះក្លាយជារដ្ឋដំបូងគេ ដែលរារាំងយុវជនក្រោមអាយុ ១៦ឆ្នាំប្រកបដោយប្រសិទ្ធភាពមិនឲ្យមានគណនី នៅលើវេទិការបស់បណ្ដាញសង្គមនានា ដូចជា TikTok និង Instagram ជាដើម។

វិធានការ ដែលអភិបាលរដ្ឋ លោក Ron DeSantis បាននិយាយថា លោកនឹង «ប្រឹងប្រែងដោះស្រាយជាមួយ» នៅចុងសប្តាហ៍នេះ និងដែលមិនទាន់បានចុះហត្ថលេខានៅឡើយ អាចនឹងមានសក្តានុពលកែប្រែជីវិតរបស់យុវជនរាប់លាននាក់ នៅរដ្ឋ Florida។

ច្បាប់នេះក៏ប្រហែលជាប្រឈមនឹងបញ្ហារដ្ឋធម្មនុញ្ញផងដែរ។ តុលាការសហព័ន្ធបានរារាំងដល់ការចេញច្បាប់បណ្ដាញសង្គមដែលមិនសូវកម្រិតដល់យុវជន និងដែលត្រូវបានអនុម័តក្នុងឆ្នាំ២០២៣ ដោយរដ្ឋ Arkansas និង Ohio។ ចៅក្រមនៅក្នុងករណីទាំងនោះ បាននិយាយថា លក្ខន្តិកៈថ្មីទំនងជាប៉ះពាល់ដល់សិទ្ធិនិយាយស្ដីដោយសេរីរបស់ក្រុមហ៊ុនបណ្ដាញសង្គម ក្នុងការចែកចាយព័ត៌មាន ក៏ដូចជាសិទ្ធិរបស់យុវជន ក្នុងការទទួលបានសិទ្ធិប្រើប្រាស់វេទិកានោះ។

ច្បាប់ថ្មីនៅក្នុងរដ្ឋ Florida ដែលទទួលបានការអនុម័ត កាលពីថ្ងៃទី២២ ខែកុម្ភៈ នឹងតម្រូវឲ្យរាល់បណ្តាញសង្គមទាំងអស់ ទាំងការពារមនុស្សដែលមានអាយុក្រោម ១៦ឆ្នាំមិនឲ្យបង្កើតគណនី និងបិទគណនីដែលវេទិកាដឹងច្បាស់ ឬជឿថា ជារបស់អ្នកប្រើប្រាស់មិនទាន់គ្រប់អាយុ។ ច្បាប់នេះនឹងអនុវត្តចំពោះកម្មវិធី និងគេហទំព័រនានាដែលមានមុខងារជាក់លាក់ ដោយភាគច្រើនទំនងជារួមបញ្ចូលដូចជា Facebook, Instagram, Snapchat, TikTok និង YouTube៕