បាល់ទាត់៖ កីឡាករ ចាន់ វឌ្ឍនាកា បានទាត់បំប៉ោងសំណាញ់ទីគូប្រកួត ២គ្រាប់បន្ថែមទៀតហើយសម្រាប់ការបង្ហាញខ្លួនក្នុងជម្រើស ១១នាក់ដំបូងលើកទី២ ដោយជួយឲ្យក្រុមបឹងកេតយកឈ្នះម្ចាស់ផ្ទះអាស៊ីអឺរ៉ុបដោយលទ្ធផល ៣-១ ក្នុងជំនួបបង្គ្រប់សប្ដាហ៍ទី២ នៃពានរង្វាន់មិត្តហ្វូនខេមបូឌានលីគកាលពីល្ងាចថ្ងៃទី៧ ខែកក្កដា ឆ្នាំ២០២១ ម្សិលមិញ។
ការប្រកួតនៅកីឡដ្ឋាន AEU Sport Park នេះ វគ្គទី១ មិនមានគ្រាប់បាល់កើតឡើងនោះទេ ខណៈចូលវគ្គទី២ បានប្រមាណ ២នាទីខ្សែការពារអាស៊ីអឺរ៉ុប Asami Kanta បានបង្កកំហុសក្នុងប្រអប់គ្រោះថ្នាក់លើ ចាន់ វឌ្ឍនាកា ដែលផ្ដល់ឱកាសឲ្យខ្សែប្រយុទ្ធជំនាញជើងឆ្វេងរូបនេះ ទាត់បាល់ពិន័យ ១១ម៉ែត្របើកការនាំមុខអាស៊ីអឺរ៉ុប ១គ្រាប់មុននៅនាទី៤៨។ ក្រោយបំប៉ោងសំណាញ់ទីក្រុមម្ចាស់ផ្ទះដោយបាល់ប៉េណាល់ទី បឹងកេតបានព្យាយាមស្វែងរកគ្រាប់បាល់បន្ថែមរហូតដល់នាទី៦៩ កីឡាករ ចាន់ វឌ្ឍនាកា ដដែលក៏រកបានគ្រាប់ទី២ មុនកីឡាករ Abee Hurbert វាយបកបាន ១គ្រាប់វិញឲ្យអាស៊ីអឺរ៉ុបនៅនាទី៧៥។ ប៉ុន្ដែនៅចុងម៉ោង វឌ្ឍនាកា បានបញ្ជូនបាល់ឲ្យ សេត រ៉ូស៊ីប ស៊ុតបន្ថែម ១គ្រាប់ទៀតនៅនាទី៨៦ ដែលជាគ្រាប់កាត់សេចក្ដីជួយឲ្យបឹងកេតឈ្នះអាស៊ីអឺរ៉ុប ៣-១ តែម្ដង។
តាមរយៈការរកបាន ២គ្រាប់ក្នុងការជាប់ជម្រើស ១១នាក់ដំបូងលើកទី២ នេះដែរបានធ្វើឲ្យ ចាន់ វឌ្ឍនាកា ក្លាយជាកីឡាករក្នុងស្រុក ដែលរកបានគ្រាប់បាល់ច្រើនជាងគេចំនួន ៥គ្រាប់ បន្ទាប់ពីការបង្ហាញខ្លួនក្នុងជម្រើស ១១នាក់លើកដំបូង រូបគេធ្វើបាន Hat-Trick ៣គ្រាប់ម្នាក់ឯងជួយឲ្យក្រុមបឹងកេត យកឈ្នះក្រុមម្ចាស់ផ្ទះខេត្តព្រៃវែងដោយលទ្ធផល ៣-១ ដូចគ្នា កាលពីចុងសប្ដាហ៍មុន។ ដោយឡែកក្រុមការពារតំណែងជើងឯកបឹងកេតវិញ ក្រោយបន្ថែម ៣ពិន្ទុបន្ថែមបានធ្វើឲ្យពួកគេតាមទាន់ក្រុមព្រះខ័នរាជស្វាយរៀង វិសាខា និងគិរីវង់សុខសែនជ័យ ដែលមាន ៩ពិន្ទុស្មើគ្នាបន្ទាប់ពីឆ្លងកាត់ ៦ប្រកួតឈ្នះ៣ និងចាញ់៣។ ចំណែកក្រុមអាស៊ីអឺរ៉ុបបានរក្សាកៅអីលេខ៩ បណ្ដោះអាសន្នជាមួយលទ្ធផល ៦ប្រកួតឈ្នះ២ និងចាញ់ ៤ប្រកួត ទើបរកបាន ៦ពិន្ទុប៉ុណ្ណោះ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
