ឆ្មាំល្បាតឆ្នេររបស់ប្រទេសចិន បាននិយាយថា កងល្បាតរបស់ខ្លួនក្នុងខេត្ត ហ្វ៊ូជាន (Fujian) បានធ្វើសមយុទ្ធអនុវត្តច្បាប់យ៉ាងទូលំទូលាយនៅក្នុងតំបន់សមុទ្រ សៀមិន-គីនមិន (Xiamen-Kinmen) កាលពីរសៀលថ្ងៃអាទិត្យ (២៥ កុម្ភៈ)។ សមយុទ្ធនេះមានគោលបំណងសាកល្បងសមត្ថភាពឆ្លើយតបគ្រាអាសន្នរបស់កងនាវាអនុវត្តច្បាប់។

ឆ្មាំល្បាតឆ្នេរចិនបាននិយាយថា ខ្លួនបានចាត់វិធានការក្នុងអំឡុងពេលល្បាត «ដើម្បីពង្រឹងការត្រួតពិនិត្យការអនុវត្តច្បាប់នៅក្នុងតំបន់សំខាន់ៗ រក្សាសណ្តាប់ធ្នាប់ប្រតិបត្តិការក្នុងតំបន់សមុទ្រប្រកបដោយប្រសិទ្ធភាព និងការពារសុវត្ថិភាពជីវិត និងទ្រព្យសម្បត្តិរបស់អ្នកនេសាទប្រកបដោយប្រសិទ្ធភាព»។

ប្រទេសចិន បានប្រកាសកាលពីថ្ងៃអាទិត្យ សប្ដាហ៍មុនថាឆ្មាំល្បាតឆ្នេររបស់ខ្លួននឹងចាប់ផ្តើមល្បាតជាប្រចាំ និងបង្កើតសកម្មភាពអនុវត្តច្បាប់នៅជុំវិញកោះ គីនមិន ដែលគ្រប់គ្រងដោយកោះតៃវ៉ាន់ បន្ទាប់ពីការស្លាប់របស់ជនជាតិចិនពីរនាក់ ដែលរត់គេចខ្លួនចេញពីឆ្មាំល្បាតឆ្នេរតៃវ៉ាន់ ដោយសារបានចូលទៅជិតដែនទឹកកោះ គីនមិន ពេក។

កោះ គីនមិន ដែលជាកោះជួរមុខមានប្រជាជនប្រហែល ១០០.០០០ នាក់ និងមានបន្ទាយយោធាតៃវ៉ាន់ដ៏ធំមួយនេះ ស្ថិតនៅចម្ងាយដ៏ជិតពីទីក្រុង សៀមិន (Xiamen) និងទីក្រុង ឈានចូវ (Quanzhou) របស់ប្រទេសចិន៕