បាល់ទាត់៖ ខ្សែប្រយុទ្ធសញ្ជាតិប្រេស៊ីល Marcio De Oliveira Marques បានបញ្ចប់ទី ៣គ្រាប់ម្នាក់ឯង (Hat-Trick) ជួយឲ្យក្រុមណាហ្គាវើលដ៏យកឈ្នះក្រុមនគរបាលជាតិ ដោយលទ្ធផល ៤-១ ក្នុងជំនួបបង្គ្រប់សប្ដាហ៍ទី៣ នៃពានរង្វាន់មិត្តហ្វូនខេមបូឌានលីគឆ្នាំ២០២១ កាលពីល្ងាចថ្ងៃទី៧ ខែកក្កដាម្សិលមិញ។
ការប្រកួតដំបូងនៅកីឡដ្ឋាន 7ND ដែលក្រុមនគរបាលជាតិយកធ្វើទឹកដីបណ្ដោះអាសន្ននេះ ហាក់មិនសូវកាក់កបសម្រាប់ក្រុមម្ចាស់ផ្ទះឡើយ បន្ទាប់ពីត្រូវក្រុមណាហ្គាវើលដ៏ស៊ុតបំប៉ោងសំណាញ់ទី ៤គ្រាប់ក្នុងនោះ ៣គ្រាប់រកបានដោយកីឡាករ Marcio នៅនាទី២១, ៣៣ និងនាទី៦២ និង ១គ្រាប់ទៀតគឺជាគ្រាប់បាល់ទាត់ហ្វ្រីឃីតដ៏ល្អរបស់ខ្សែបម្រើខ្មែរ-បារាំង គួច ដានី។ សម្រាប់ជ័យជម្នះក្រៅដីនេះបានធ្វើឲ្យក្រុមលោក មាស ចាន់ណា ហក់ទៅឈរលេខរៀងទី៣ បណ្ដោះអាសន្នជាមួយលទ្ធផល ៦ប្រកួតឈ្នះ៣ ស្មើ២ និងចាញ់ ១ រកបាន ១១ពិន្ទុ ស្របពេលក្រុមនគរបាលជាតិបន្ដឈរលេខរៀងទី១២ និងមាន ១ពិន្ទុក្នុងដៃ ដែលរកបានពីការប្រកួតស្មើក្រុមវិសាខាកាលពីដើមរដូវកាលដដែល ក្រោយឆ្លងកាត់ ៥ប្រកួតស្មើ១ និងចាញ់៤ មិនទាន់ស្គាល់ជ័យជម្នះម្ដងឡើយ។
ចំណែកកីឡាករ Marcio វិញគឺជាកីឡាករទី៣ ដែលធ្វើបាន Hat-Trick ៣គ្រាប់ម្នាក់ឯងក្នុងរដូវកាលថ្មីឆ្នាំ២០២១ បន្ទាប់ពីកីឡាករ ចាន់ វឌ្ឍនាកា របស់ក្លិបបឹងកេត និងកីឡាករ Abee Hurbert របស់ក្លិបអាស៊ីអឺរ៉ុបដែលរកបានម្នាក់ ៣គ្រាប់ក្នុងមួយប្រកួតដូចគ្នាកាលពីចុងសប្ដាហ៍មុន៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
