បន្ទាយមានជ័យ៖ លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធាន អចិន្ត្រៃយ៍ គ.ជ.ប.ជ បានលើកឡើងថ្លែងថា ជនរងគ្រោះ គឺជាប្រភពព័ត៌មានយ៉ាងសំខាន់ ដែលយើងត្រូវតែធ្វើការទទួលបាននូវព័ត៌មានបន្ថែមពីពួកគាត់អំពីការជួញដូរ ដែលពួកគាត់បានជួបប្រទះបញ្ហា បើសិនយើងគ្រាន់តែមើល ហើយសន្និដ្ឋានប្រាកដណាស់យើងមិនទទួលបានព័ត៌មានលម្អិតនោះទេ។
លោកជំទាវ លោកឡើងបែបនេះ ក្នុងឱកាសអញ្ជើញបើកវគ្គបណ្តុះបណ្តាលស្តីពី បែបបទ និងនីតិវិធីនៃការកំណត់អត្តសញ្ញាណជនរង គ្រោះដោយអំពើជួញដូរមនុស្ស ដើម្បីផ្តល់សេវាសមស្រប ជូនដល់អ្នកពាក់ព័ន្ធនៅខេត្តបន្ទាយមានជ័យ ដែលមានរយៈពេល២ថ្ងៃ (ចាប់ពីថ្ងៃទី២៦-២៧ ខែកុម្ភៈ ឆ្នាំ២០២៤។
លោកជំទាវ ជូ ប៊ុនអេង បានបញ្ជាក់ថា បច្ចុប្បន្ននៅកម្ពុជាមានបទល្មើសចំនួន២ប្រភេទ ១-បទល្មើសពិត និង២-បទល្មើសប្រឌិត ដែលសមត្ថកិច្ចបានរកឃើញជាបន្តបន្ទាប់ទាំងបទល្មើសពិត និងបទល្មើសផ្សេងក្លាយ។ លោកជំទាវបន្តថា ពេលខ្លះពេលយើងគ្រាន់តែមើលហើយសន្និដ្ឋាននោះទិន្នន័យដែលយើងទទួលបាននិងមិនច្បាស់លាស់ឡើយ ហើយយើងក៏មិនអាចដាក់ផែនការ ឬកំណត់មុខសញ្ញាច្បាស់លាស់បានដែរ។
ត្រង់ចំណុចនេះលោកជំទាវ បានលើកឡើងថា បើយើងចង់ព័ត៌មានពីជនរងគ្រោះ យើងត្រូវធ្វើការកំណត់ឱ្យបានច្បាស់លាស់ មួយណាជាជនរងគ្រោះពិតប្រាកដ មិនមែនកំណត់តែអត្តសញ្ញាណដែលជនរងគ្រោះផ្តល់ព័ត៌មានឱ្យនោះទេ គឺត្រូវតែមានភស្តុតាង និងទឡ្ហីករណ៍ត្រឹមត្រូវ៕ អត្ថបទ៖ រឿង ចន្ទ្រា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
