ភ្នំពេញ ៖ មន្រ្តីជំនាញនៃមជ្ឈមណ្ឌលជាតិផ្តល់ឈាម អំពាវនាវដល់មន្រ្តីរាជការ និងប្រជាពលរដ្ឋទាំងអស់ ដែលបរិច្ចាកឈាមជាលក្ខណៈ គ្រួសារ ឬដោយស្ម័គ្រចិត្ត សូមចូលរួមសកម្មភាពផ្តល់ឈាមឲ្យបានជាបន្តបន្ទាប់ ដើម្បីរក្សាផ្គត់ផ្គង់ឈាមឲ្យមានស្ថិរភាព ជួយសង្គ្រោះ ដល់ជនដែលងាយរងគ្រោះ។

លោកស្រីវេជ្ជបណ្ឌិត ហេង សុខចម្រើន អនុប្រធានមជ្ឈមណ្ឌលជាតិផ្តល់ឈាម លើកឡើងនៅក្នុងកម្មវិធីបរិច្ចាកឈាមដោយ ស្ម័គ្រចិត្ត ថ្នាក់ដឹកនាំ និងមន្រ្តីរាជការ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នៅថ្ងៃទី ២៦ ខែ កុម្ភៈ ឆ្នាំ២០២៤ នេះថា នៅក្នុងឆ្នាំ ២០២៣ កន្លងមកនេះ ការផ្គត់ផ្គង់ឈាមទៅដល់មន្ទីរពេទ្យនានានៅមានកម្រិត តែនៅដើមឆ្នាំនេះ ឃើញថា សកម្មភាពមនុស្សធម៌ដ៏ប្រពៃ និងមានតម្លៃបំផុតមិនអាចកាត់ថ្លៃបាន ក្នុងការចូលរួមលើកស្ទួយការងារសង្គម មានសម្ទុះការចូលរួម ផ្តល់ឈាមពីមន្រ្តីរាជការ និងពីវិស័យឯកជន មានកំណើននៃការចូលរួមបរិច្ចាកឈាមគួរឲ្យកត់សម្គាល់។

លោកស្រីវេជ្ជបណ្ឌិត បន្តថា ទោះបីនៅដើមឆ្នាំនេះ ការចូលរួមបរិច្ចាកឈាមយ៉ាងផុលផុសក៏ដោយ ស្របពេលបច្ចេកវិទ្យា វិជ្ជសាស្រ្តកំពុងរីកចម្រើនក្នុងស្រុក ការផ្គត់ផ្គង់ឈាមនឹងអាចមានកំណើនកើនឡើងបន្ថែមទៀត។ បញ្ហានេះ, លោកស្រីវេជ្ជបណ្ឌិត ហេង សុខចម្រើន បានប្តេជ្ញា និងបានអំពាវដល់មន្រ្តីរាជការ និងប្រជាពលរដ្ឋជួយគាំទ្រ និងបន្តសកម្មភាពចូលរួមផ្តល់ឈាម ទាំងការ ផ្តល់ជាលក្ខណៈគ្រួសារ ឬដោយស្ម័គ្រចិត្ត មានជាបន្តបន្ទាប់ ដើម្បីចូលចំណែកក្នុងផែនការប្រមូលឈាមរបស់មជ្ឈមណ្ឌលជាតិ ផ្តល់ឈាមឲ្យបានឆ្លើយតបនឹងតម្រូវការ ដើម្បីផ្តត់ផ្គង់ទៅដល់មន្ទីរពេទ្យនានាទូទាំងប្រទេសឲ្យបានគ្រប់គ្រាន់ និងទាន់ពេលវេលា ក្នុងការជួយសង្គ្រោះជីវិតមនុស្ស។

នៅក្នុងកម្មវិធីបរិច្ចាកឈាមនេះ, ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លើកឡើងថា ការចូលរួមបរិច្ចាកឈាម ពិតជាមានសារៈសំខាន់ណាស់ ព្រោះការបរិច្ចាកឈាមរបស់សប្បុរសជន គឺមិនមែនយកទៅ ជួញដូរ ឬការធ្វើអាជីវកម្មណាមួយនោះឡើយ ពោលគឺការជួយដល់មន្ទីរពេទ្យដែលកំពុងមានតម្រូវការឈាម ដែលតាមរយៈនេះ អាចចាត់ទុកថា ជាការចូលរួមលើកស្ទួយការងារសង្គម និងជាការបង្ហាញនូវសកម្មភាពមនុស្សធម៌ដ៏មានតម្លៃ ខណៈដែលសង្គមកំពុង មានតម្រូវការឈាម ដើម្បីជួយដល់អ្នករងគ្រោះ និងងាយរងគ្រោះ ហើយសូមឲ្យសកម្មភាពមានជាបន្តបន្ទាប់៕

អត្ថបទ៖ សុន រ៉ាឌី