ប្រជាពលរដ្ឋដែលបានតាមដានសភាពការណ៍ នៃដំណើរការការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ កាលពីថ្ងៃទី២៥ ខែកុម្ភៈ ឆ្នាំ២០២៤នេះ បានអបអរសាទរ និងពេញចិត្តចំពោះដំណើរការបោះឆ្នោតព្រឹទ្ធសភាដែលបានប្រព្រឹត្តទៅប្រកបដោយសុក្រឹតភាព យុត្តិធម៌ តឹ្រមត្រូវ ហើយបណ្តាគណបក្សនយោបាយនានាមានភាពចាស់ទុំតាំងពីអនុវត្តយុទ្ធនាការឃោសនារហូតដល់ការបោះឆ្នោតបានបិទបញ្ចប់។
ពលរដ្ឋថ្លែងប្រាប់ BTV នៅថ្ងៃទី២៦ ខែកុម្ភៈនេះថា នៅក្នុងដំណើរការ ការបោះឆ្នោតជ្រើសតាំងសមាជិកព្រឹទ្ធសភាម្សិលមិញនេះ គ្រប់ភាគីអង្គបោះឆ្នោតទាំងអស់ គឺបាននាំគ្នាចូលរួមបោះឆ្នោត ក្នុងទឹកមុខសប្បាយរីករាយ ក្រោយមស្ថានភាព សន្តិសុខ សណ្តាប់ធ្នាប់មានភាពស្ងប់ស្ងាត់មិនមានបាតុភាពអាក្រក់ណាមួយកើតឡើង ចាប់តាំងពីការបើកការិយាល័យបោះឆ្នោត ការរាប់សន្លឹកឆ្នោត និងការប្រកាសលទ្ធផលបឋម។
តាមរយៈការបោះឆ្នោតជ្រើសតាំងសមាជិកព្រឹទ្ធសភានេះពលរដ្ឋរំពឹងថា ស្ថាប័នព្រឹទ្ធសភានឹងបង្កើនធ្វើការសម្របសម្រួលល្អប្រសើរ រវាងស្ថាប័នរដ្ឋសភា និងស្ថាប័នរាជរដ្ឋាភិបាល ជំរុញមូលដ្ឋានឃុំសង្កាត់ទាំងអស់ បន្តការអភិវឌ្ឍន៍រីកចម្រើន ជាពិសេសជំរុញអនុវត្តគោលនយោបាយវិមជ្ឈការ និងវិសហមជ្ឈការ ពោល គឺជួយជំរុញធ្វើឲ្យមានការអភិវឌ្ឍបានត្រឹមត្រូវតាមគោលការណ៍នៃលទ្ធិប្រជាធិបតេយ្យ និងនីតិរដ្ឋ ។
សូមបញ្ជាក់ថាការបោះឆ្នោតជ្រើសតាំងសមាជិកព្រឹទ្ធសភាពីមិ្សលមិញនេះនៅទូទាំងប្រទេស គ.ជ.ប បានរៀបចំការិយាល័យបោះឆ្នោតចំនួន ៣៣ ហើយនៅក្នុងចំណោមអង្គបោះឆ្នោតសរុប ១១៧៤៧នាក់ មានអង្គបោះឆ្នោតបានចូលរួមបោះឆ្នោតចំនួន ១១៧៣០ នាក់ស្មើនឹង៩៩.៨៦%។ ខណៈ គ.ជ.ប. បាន ប្រកាសលទ្ធផលបឋមរួចហើយ ហើយលទ្ធផលបណ្តោះអាសន្ននឹងប្រកាសនៅថ្ងៃទី២៩ ខែកុម្ភៈ។ ចំណែកលទ្ធផលផ្លូវការនឹងប្រកាសនៅក្នុងចន្លោះថ្ងៃទី៤ ដល់ថ្ងៃទី៦ ខែមីនា ឆ្នាំ២០២៤នេះ៕ អត្ថបទ ស៊ុម សុខជា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
