នៅព្រឹកថ្ងៃទី២៦ ខែកុម្ភៈ ឆ្នាំ២០២៤នេះ ឯកឧត្តម គីម រិទ្ធី អភិបាលនៃគណៈអភិបាល ខេត្តព្រះវិហារ បានអញ្ជើញជួបសំដែងការគួរសមជាមួយប្រធាន និងបុគ្គលិកអង្គការ ទស្សនៈ ពិភពលោកប្រចាំខេត្តព្រះវិហារ ដែលបានប្រព្រឹត្តទៅនៅអគារសាលាខេត្តជាន់ទី៣ដោយមាន ការអញ្ជើញចូលរួមពីសំណាក់លោក លោកស្រីជាអភិបាល ក្រុង/ស្រុក ថ្នាក់ដឹកនាំ មន្ទីរអង្គភាព ជុំវិញខេត្តជាច្រើនរូប ។

នៅក្នុងឱកាសនោះ ប្រធានព្រមទាំងបុគ្គលិកនៃអង្គការទស្សនៈពិភពលោក បានជម្រាបជូនអំពីរបាយការណ៍លទ្ធផលការងារប្រចាំឆ្នាំ២០២៣ ដែលសម្រេចបាននាពេលកន្លងមក និង បានលើកឡើងពីបញ្ហាប្រឈមសំណូមពរ និងទិសដៅបន្តទៅតាមគម្រោងជាច្រើន ដែលជា គម្រោងរបស់អង្គការទស្សនៈពិភពលោកប្រចាំខេត្តព្រះវិហារ ដែលក្នុងនោះរួមមានដូចជា គម្រោងក្នុងកម្មវិធីកិច្ចការពារកុមារ និងការចូលរួមរបស់យុវជន។

កម្មវិធីសុខភាពអាហាររូបត្ថម្ភ អនាម័យទឹកស្អាត និងការអភិវឌ្ឍសេដ្ឋកិច្ចនិងជីវភាព។ កម្មវិធីអប់រំនិងបំណិនជីវិត កម្មវិធី កុមារទំនុកបម្រុង និងការចូលរួមរបស់សហគមន៍ និងគម្រោងផ្សេងៗជាច្រើនទៀត។ ជាមួយគ្នា នេះផងដែរ ខាងអង្គការក៏បានសំណូមពរសុំអោយមានការចូលរួមសហការ នូវគម្រោងរបស់ អង្គការ ពីសំណាក់អាជ្ញាធរមូលដ្ឋាន ដើម្បីទទួលបានជោគជ័យ។

ថ្លែងនៅក្នុងឱកាសនោះ ឯកឧត្តម គីម រិទ្ធី អភិបាលខេត្ត បានថ្លែងអំណរគុណ ដល់ ប្រធាន និងបុគ្គលិកនៃអង្គការទស្សនៈពិភពលោក ដែលបានចូលជួបសម្តែងការគួរសម និង រាយការណ៍​អំពីរបាយការណ៍សង្ខេប ​លទ្ធផលការងារដែលសម្រេចបានរបស់អង្គការ ក្នុងឆ្នាំ ២០២៣ ក៏ដូចជាបញ្ហាប្រឈម សំណូមពរ និងទិសដៅការងារបន្តឆ្នាំ២០២៤ នាពេលនេះ។

ឯកឧត្តមបានឱ្យដឹងថា គម្រោងទាំងអស់របស់ អង្គការទស្សនៈពិភពលោក ដែលបានលើកឡើង នាពេលនេះគឺជាគម្រោងដែលស្ថិតនៅក្នុង គោលនយោបាយរបស់រាជរដ្ឋាភិបាល ក្នុងការ អភិវឌ្ឍឱ្យមានការរីកចម្រើននៅតាមមូលដ្ឋានក៏ដូចជាសហគមន៍ ដើម្បីរក្សាបាននូវសុខមាល ភាព បង្កើននូវប្រាក់ចំណូលនិង កាត់បន្ថយភាពក្រីក្ររបស់ប្រជាពលរដ្ឋ។

ជាមួយគ្នានេះផងដែរ ឯកឧត្តមក៏បានជម្រុញទៅកាន់អាជ្ញាធរ ក្រុង/ស្រុក មន្ទីរអង្គភាព ពាក់ព័ន្ធ ចូលរួមសហការក្នុងនាមជាដៃគូអភិវឌ្ឍន៍ល្អ ក្នុងការអនុវត្តគម្រោង អោយទទួលបាន ជោគជ័យ ក៏ដូចជាសម្រេចបាននូវគោលនយោបាយរបស់រាជរដ្ឋាភិបាល។