រដ្ឋមន្ត្រីការពារជាតិអ៊ីស្រាអែល លោក យ៉ាវ ហ្កាឡាន់ (Yoav Gallant) និយាយកាលពីថ្ងៃអាទិត្យ (២៥ កុម្ភៈ) ថាអ៊ីស្រាអែល បានប្តេជ្ញាបន្តការវាយប្រហារលើក្រុមសកម្មប្រយុទ្ធ ហេសបូឡា (Hezbollah) របស់ប្រទេសលីបង់ ទោះបីជាមានបទឈប់បាញ់ជាមួយក្រុមហាម៉ាស នៅតំបន់ហ្កាហ្សាស្ទ្រីបក៏ដោយ។

លោក ហ្កាឡាន់ បាននិយាយអំឡុងពេលចុះពិនិត្យទីបញ្ជាការកងទ័ពការពារអ៊ីស្រាអែលភាគខាងជើងនៅទីក្រុង សាហ្វេដ (Safed) ថា «បើទោះជាមានបទឈប់បាញ់បណ្តោះអាសន្ននៅហ្កាហ្សាក៏ដោយ យើងក៏នឹងបង្កើនការវាយប្រហារនៅភាគខាងជើង ហើយនឹងបន្តរហូតដល់ការដកខ្លួនពេញលេញនៃក្រុមហេសបូឡា ពីព្រំដែន និងការវិលត្រឡប់របស់អ្នកស្រុកទៅកាន់លំនៅឋានរបស់ពួកគេវិញ»។

ប្រធានក្រុមហេសបូឡា លោក ហាសសាន ណាស្រាលឡា (Hassan Nasrallah) បាននិយាយនៅក្នុងសប្តាហ៍ដំបូងនៃខែកុម្ភៈថា ការបាញ់ផ្លោងឆ្លងព្រំដែនរបស់ក្រុមលោកនឹងបញ្ចប់នៅពេលដែល «ការឈ្លានពាន» របស់អ៊ីស្រាអែលនៅលើតំបន់ហ្កាហ្សាស្ទ្រីប ត្រូវបញ្ឈប់។ ក្រុមនេះបានធ្វើការវាយប្រហារទៅវិញទៅមកជាមួយយោធាអ៊ីស្រាអែល ឆ្លងកាត់ព្រំដែនភាគខាងត្បូងប្រទេសលីបង់ ក្នុងការគាំទ្រក្រុមឡេស្ទីនហាម៉ាសប៉ា ដែលជាសម្ព័ន្ធមិត្តរបស់ខ្លួន។

យោងតាមទិន្នន័យដែលចេញផ្សាយដោយការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌នៅចុងខែមករា បានឱ្យដឹងថា ជុំបច្ចុប្បន្ននៃជម្លោះអ៊ីស្រាអែល-លីបង់ បានបណ្តាលឱ្យមនុស្សប្រហែល ៨២.០០០ នាក់ផ្លាស់ទីលំនៅនៅក្នុងប្រទេសលីបង់៕